Manchester United head coach Michael Carrick chu a hna aṭanga ban mai theih dinhmunah a ding mek nia sawi a ni a. Old Trafford club hian a thlaktu turin Germany leh Bayern Munich head coach hlui Julian Nagelsmann bakah, Newcastle United manager hlui Eddie Howe te an ngaihtuah mek niin chanchinbu hrang hrang Talksport leh The Athletic te chuan an tarlang a ni.

Manchester United dressing room chhungrila thudawnte tarlan danin, club chhungah hian Michael Carrick-a dinhmun chu a derthawng tawh hle a, ban a nih mai an inbeisei tawh thu an sawi chhuak a. Club neitu INEOS lamin manager thar zawn kawngah hma an la mek a, Carrick-a thlaktu tur shortlist-ah hian hming langsar tak tak an telh chho mek a ni.

Manager hlui Ruben Amorim-a'n Old Trafford a chhuahsan hnuah, interim head coach Darren Fletcher chuan match hnih chhung chu team hi a enkawl zawk a. Hemi hnu January 13 khan Michael Carrick hi head coach ni turin Manchester United-ah a lo kir leh ta a nih kha.

Carrick hian interim manager anga United a enkawl ṭan tirh lam khan bul a ṭan ṭha em em a, Premier League-a an khingpui lian Manchester City leh Arsenal te lakah hnehna ropui tak a chanpui nghal a ni. Hemi hnu hian theih tawp chhuah chhunzawm zelin, United chu Premier League-ah pathumna (third place) a luahtir a, Champions League khel turin a hruai tling bawk a ni.

Chuti chung chuan, tun dinhmunah hian Carrick-a hma hun chu a thim chho hle nia sawi a ni a. Club neitu INEOS chuan he dinhmun chelh tur hian mi rintlak zawk an melh kual mek a, Julian Nagelsmann leh Eddie Howe te bakah candidate dangte pawh an en kual tel bawk a ni. Eddie Howe hi INEOS hotuten an ngaihhlut em em zinga mi a ni a, Nagelsmann pawh Germany leh Bayern Munich-a a hlawhtlinna lo neih tawhte avangin an thlakhlelh zingah a tel bawk a ni.