Progress with Unity Stadium-ah Manchester United Women leh Manchester City Women te chu derby match hmuhnawm takah 1-1 in an inhnehtawk.

Eva Olid-i enkawl United Women tan hian Elisabeth Terland-i'n minute 89-naah an siphurh a rawn sut a, mualneitu lamin an point hlu tak an humhim ta a ni.

Match ṭan tir aṭangin United lamin mualneitu an nihna angin nawr nghal an tum a, Jess Park-i'n ball rawn nawr chho bawk mah se goal zawnah a hlawhtling lo. City tan Lauren Hemp-i'n chance hmasaber neiin, a shot hi United goalkeeper Phallon Tullis-Joyce-i'n ṭha takin a lo dangsak a ni. Hemi hnu hian Aoba Fujino-i'n pet ve lehin, hla deuhah a zawn lo thung.

United lamin attacking game mawi tak an chhuah chhunzawm a, Andrea Medina leh Ella Toone te in-pass kual hnuah box chhungah ball hlauhawm thawn luh ni mah se, Terland-i'n a lo nang hman lo. Minute 30-na velah Toone-i'n box pawn aṭangin pet mah se, City keeper Ayaka Yamashita-i'n awlsam takin a lo man sak a ni. United-in an nawr liam zel a, Medina-i pass aṭangin Terland-i'n chance ṭha nei mah se goal-ah a chantir thei hram lo a, half-time hian goal awm lovin 0-0 in an chawl a ni.

Second half ṭan a ni a, minute 55-naah Park-i pass aṭangin Terland-i'n chance nei lehin, City keeper Yamashita-i'n a lo hnek per sak leh a. Minute 60-naah United-in hmahruaina goal khungna hun ṭha tak nei lehin, Park-i 'knuckleball' pet zawk mai chu crossbar a per dawp a ni.

City striker hlauhawm Khadija Shaw-i chuan he match-ah hian hmun a chang tam lo hle a, mahse minute 67-naah a theihna rawn pholangin, Dominique Janssen-i laka a insiamrem hnuah Tullis-Joyce-i paltlangin City hma a hruaitir ta a ni. United-in siphurh rulh tumin an nawr nghal a, minute 76-naah Julia Zigiotti-i'n chance ṭha lutuk pawh goal chin chungah a pet kang hlauh thung.

Minute 86-naah United player hlui Grace Clinton-i'n keeper Tullis-Joyce-i a bum hnuah goal thun a tum a, mahse United defender Maya Le Tissier-i'n goal line aṭangin a lo thiat chhuak hram a ni.

Hemi hnu minute 89-naah United-in an hlawhtlinna an hmu ta a. Le Tissier-i cross chu Shaw-i'n lo tauh chhuak mah se, Terland-i'n tha hnemngai takin goal-ah a lo pet lut zui ta zawk a ni. Extra time minute 5 belh a nih hnuah team pahnihte hi 1-1 in an inhnehtawk ta a ni.

Manchester United Women hian Nilaini zanah Players' Cup inelnaah Burnley an hmachhawn leh ang.