Manchester United leh Bournemouth inkhelah, minute 71-naa Brazilian striker Evanilson-a goal khung chuan inkhel thawnthu a titawp a ni ber mai. Evanilson-a goal hian score chu 3-0 niin a siam a, Red Devils tana rawn inpeih let leh theihna beiseina awm chhun pawh a tihtawpsak nghal bawk.

He inkhelh zawh hian head coach Michael Carrick chuan pressure lian tak a hmachhawn chho mek a. Bournemouth lakah hian an siamṭhat ngei tur thu lo tiam tawh mah se, a player-te chuan a beiseina an tithlawn chiang hle a ni. Old Trafford-a hun tawp dawn lam phei chu boruak a rit zual hle a, fan ṭhenkhat chu khelmual aṭangin an chhuak ruih ruih a, ṭhenkhat erawh chuan ban mai theih dinhmuna ding Carrick chu zahna lantir nan a hming lamin an lo au bawk a ni.

Sky Sports hnena a thuchhuahah, Carrick chuan dressing room chhunga an player-te beidawnna leh an inrintawkna tlakhniam dan chu a sawichhuak a ni. Carrick chuan, "Inkhelh tawpah khan rilru a inphawklek kual nasa hle a, thil nuam tak zawng a ni lo a ni. Player-te tan ni harsa tak a ni a, boruak rit tak karah inkhel kan hmachhawn a, chu chu a hriat theih hle a ni. Chhunglamah khuan an na takzet a, an beidawng em em bawk. Boruak nuam lo tak a ni a, mahse hetiang dinhmuna kan ding hi kan pawm a ngai a ni," tiin a sawi.

A player-te laka a khawngaih thu sawi chhunzawmin Carrick chuan, "Rilru mumal lo tak ka pu a ni. Hun harsa tak an paltlang mek avangin ka player-te hi ka khawngaih hle. A ṭhen chu kan pui thei a, a ṭhen erawh dinhmun hian a hrilhfiah zui mai a ni. Fan-te min thlawpna hi ka hlut hle a, mahse dinhmun chu a nihna ang hian a ding a ni. Kan khel ṭha tawk lo a ni e," tiin a sawi bawk.

Manchester United fan-te chuan thil thleng mek chu an club chanchina manager inthlak ngun lutuk thil thleng nawn leh mai turah an ngai tan a. Tu mahin manager dang ban leh chu duh tawh lo mah se, he team hian match riat an khelh tawhah point sarih chauh an la hmu a ni. Hei hi Premier League hunbi chhunga season bul an ṭan chhiat ber ṭum a la ni hial bawk.

A hmabak tur chungchang an zawhna chu chhangin Carrick chuan, "Dinhmun khirh tak a ni a. Eng nge lo thleng leh ang? Ka hre bik lo. He football club tana ṭha ber tur chu ka ti reng zel ang a, tunah pawh chu chu ka thlak lo. Ka hna hi ka ngaina a, mawhphurhna lak pawh ka duh hle. Mahse eng nge lo thleng dawn tih chu kan la nghak chhuak phawt a ngai ang," tiin a chhang a ni.

Carrick pawhin tun dinhmunah chuan thil kal chhoh dan chu a kut ata a chhuak tawh tih a pawm a. United tantute tan chuan manager thlak ngawt a tawk tawh lova, a chung lama hotu lian te aṭanga siamṭhatna kalpui a ngai niin an hria a ni. Mahse club neitu Ineos lamin hetiang thutlukna lian leh huaisenhau tak hi an siam ngam dawn em tih chu hunin a la hril ang.