Manchester United legend Ryan Giggs chuan an midfielder Kobbie Mainoo-a theihna leh a rawn ṭhan chhoh dan chungchang sawiin, club chanchina midfielder ropui berte zinga mi Paul Scholes-a dinhmun a thlen theih dan tur a sawichhuak.

Manchester United-in tun season thar an ṭan dan chu beisei a phak meuh lo a, boruak bumboh tak an paltlang mek chung pawhin midfielder Kobbie Mainoo erawh a mimal theihna pholangin a talbuai lo hle a ni.

Red Devils hian inelna hrang hrangah match nga an khelh tawh aṭangin vawihnih chiah hnehna an la chang a, vawihnih tlawmin match khat an draw bawk a ni. Heng an tlawmna match hnih te hi Premier League inelnaa an chak lohna ve ve an ni nghe nghe.

Team pum anga an chet ṭhat tawk loh lai pawhin Mainoo hian khelmual laili-ah rintlak zia a lantir thei reng a, Ryan Giggs chuan he rawlthar theihna hi fakin khelmuala a thil tih dan chu "a ti ṭha takzet" tiin a sawi.

United tana nomawi tam tak lo chawi tawhtu Giggs chuan, Mainoo hian Paul Scholes-a theihna leh dinhmun ropui tluk pha tur chuan taimak chhunzawm zel a, a theihna la neih zawng zawngte tipung tura puitlin chhoh zel a mamawh thu a sawi bawk a ni.