Manchester United chuan an beisei ang leh duh angin tun season bul an ṭan thei lo a. Lehkha bua thlirin hmachhawn awlsam zawk tura ngaih match-te nei mah se, Premier League game li an khelh tawhah point li chauh an la hlawhchhuak a ni.
World Cup kum a nih miau avangin club lian tan chuan a harsa ṭhin reng a, player lian ṭhenkhat chu pre-season-ah an rawn let har bakah match khel thei tura an fitness a la tawk lo ṭhin a ni. Chu mai bakah, United tana defender pawimawh Matthijs de Ligt ang chi player-ten hliam rei tak an tawrh zui bawk avangin Red Devils tan hian dinhmun a zangkhai lo hle.
Kumin nipui bazara an player lak thar Carlos Baleba pawhin he club tan hian ball a la pet ve miah lo a, ram aiawha inkhelh chawlh (international break) zawh, October thla hma chuan a la inlan thei dawn lo bawk a ni.
Tun season-a la inlan thei miah lo player dang pakhat chu an winger Amad a ni a. Kumin nipuia Ivory Coast tana World Cup a khelhnaah khan he tlangval hi a che ṭha em em a, he a phurna hi chhunzawm zelin season thar ṭan a inbeisei laiin, season-a an match hmasaber khelh hma chiahin hliam a tuar ta hlauh a ni.
Mahse journalist Sully chuan chanchin lawmawm rawn puangin, he winger themthiam tak hi khelmualah a inlan leh thei ṭep tawh tih a tarlang a ni.
Sully chuan, "Tun campaign-a United match nga an khelh tawh zawng zawnga inlan thei lo Amad hi a hliam aṭangin a dam ṭha chho zel niin hriat a ni," tiin a sawi.
Chanchinbumi hian sawi zawmin, "Amad hi pre-season leh season liam ta khan mual dinglam sirah a khel ṭha em em a, a inhliam tak avang khan nipui laia striker hmuna khel ṭha tak Bryan Mbeumo chu hmun dangah chhawr a ngai phah a. Amad-a a rawn let leh hian Carrick-a tan duhthlan tur thar a pe leh dawn a ni," tiin a tarlang bawk.
Season liam ta khan Amad hian inelna hrang hrangah match 33 khelin, goal hnih a khung a, midang pet luh tur vawi li a siamsak (assist) tawh bawk a ni.
International break zawh hian dam takin rawn inlan thei a nih chuan, October ni 10-a Tottenham Hotspur an hmachhawn hunah bul a ṭan theih ngei beisei a ni tawh ang.
