Manchester United chuan tun season bul an ṭan ṭha lem lo hle a. Khelh awlsam zawk tura ngaih an khelh hnem chung pawhin, league match li an khelh tawhah point li chiah an la hlawhchhuak a ni.

Season liam taa an theihna phochhuak thei lo player eng emaw zat an awm a, hei hi Pathiannia Manchester derby-a Manchester City laka 1-0 a an tlawm ṭum pawh khan a lang chiang hle. Season liam taa che ṭha em em Senne Lammens pawh tun season-ah chuan fan-te leh chanchinbumi ṭhenkhat lakah sawiselna a tawk ve ṭan a ni.

He Belgian shot-stopper hian match li-ah goal sarih ngawt a chhuah tawh a, season liam ta ang em emin rintlak a la ni thei meuh lo a ni.

'The Good, The Bad and The Football' podcast-a a inlan tumin, United midfielder hlui Paul Scholes chuan club tana Lammens-a khelh dan chungchangah rinhlelhna a neih thu a sawichhuak a.

Lammens-a theihna chungchang sawiin Scholes chuan, "Goalkeeper ṭha chungchuang (top-class) nei lovin Premier League champion thei team i hmu tawh ngai em ni? Lammens hi chutiang chu a ni maithei a, ka hre lo; thutlukna siam mai chu a la harsa deuh niin ka hria. Tlar hnung mi pali aṭangin team i din chho tur a ni a, Arsenal tih dan ang chiah khan. Kum thum emaw kum li emaw liam taa Arsenal ṭan dan ang kha a ni," tiin a sawi.

Scholes chuan sawi zawmin, "Liverpool team-ah Alisson, Arsenal-ah Raya, Manchester United-ah Peter Schmeichel leh Edwin van der Sar te kha han ngaihtuah teh. Anni zawng zawng khan goalkeeper ṭha chungchuang tak tak an nei vek a ni," a ti.

United midfielder hlui hian Lammens chu United mamawh a ni lo tawp tiin tlang takin sawi kher lo mah se, United leh manager Michael Carrick te hian a theihna tak tak hriat nan hun eng emaw chen an la mamawh niin a ngai a ni.

Scholes chuan, "Tlar hnung aṭangin bul i ṭan a ngai ngei a, chu chu thil hriatsa a ni. Mahse Michael-a'n (Carrick) dawhthei taka a la nghah a ngai dawn nge tih erawh ka hre lo a ni," tiin a sawi belh bawk.

Andre Onana hmun a luah aṭang khan United goalkeeper dinhmun chu a ziaawm chho viau tih chu phat rual a ni lo a, mahse tun hnaia Lammens-a'n goal a chhuah hnem ta deuh erawh ngaihtuahawm lamah a kal chho mek thung a ni.

Red Devils hian naktuk zan hian Carabao Cup-ah Brighton & Hove Albion chu an hmachhawn ang.