Manchester United senior team lam chu tun season ṭan tirhah beisei angin an che ṭha tawk lo maithei a, mahse an academy lam erawh an che ṭha thung hle.

United Under-21 leh Under-18 team-ah te hian theihna sang tak nei rawlthar an inlar chho nual a, Shea Lacey pawh first team squad-ah a tel chho fo a ni. Kum 15 mi lek JJ Gabriel pawh youth level-ah a langsar chho hle a, tun season chhung hian first team squad-ah telin a senior debut hial pawh a siam mai beiseiawm tak a ni chho mek. He rawlthar theihna hi kar hmasa UEFA Youth League-a hat-trick a siam khan a rawn pholang nawn leh bawk a ni.

United Under-21 te hian tun season-ah bul an ṭan ṭha hle a, Premier League 2-ah match hnih an khelh tawhah hnehna an chang ve ve a ni. Ipswich chu 5-0 ngawtin an sawp a, Leicester City pawh 4-1 in an sawp bawk. Heng hnehna pahnih bakah hian match hnih leka goal 9 lai an khung thei hian an tlarhma nawr nat zia leh an chet ṭhat zia a tarlang chiang hle.

Red Devils rawltharte hi tun dinhmunah table-ah pangana (5-na) an ni mek a, hmahruaitu lakah point khat chiahin an hnufual a ni. Mahse, an khelh tlem zawk match khat (game in hand) an khelh hunah an chak a nih chuan league hmahruaitu dinhmun an luah thei nghal dawn a ni.

United youth team hian kar tawp khan Manchester derby khel tur an ni a, mahse he match hi ṭhulh a ngaih tak avangin an khel thei ta lo a ni.

Hemi chungchangah hian club official website chuan thuchhuah siamin, "Manchester United chuan kan Premier League 2 schedule atana fixture thar a nemnghet e. Inrinni-a City khualmuala Reds derby match khelh tur chu ṭhulh a ni," tiin an puang a ni.

Website chuan chhunzawmin, "He match hi Thawhṭanni April 5, 2027-ah khelh tura ruahman thar a ni a, dar 19:00 BST-ah ṭan a ni ang," tiin a tarlang bawk.

He youth team inkhel hmuhnawm tur hi City Football Academy-ah khelh a ni dawn a ni. United Under-21 team hian Zirtawpni tlaiah khualmualah Brentford an hmachhawn leh dawn a ni.