Kum khat liam ta vel kha chuan kum 2026-27 season-ah Marcus Rashford hian Manchester United tan a khelh leh a rinawm loh hle a. Mahse Barcelona lama a mumang transfer a puitlin tak si loh avangin Old Trafford-ah a kir leh ta nge nge a ni.

Old Trafford-a a kir leh hnu hian Rashford hian United tan goal a la khung lova, midang pet luh tur assist pawh a la nei lo bawk. Chutih rualin Red Devils te pawhin tun season Premier League match nga an khelh tawh aṭangin vawikhat chiah hnehna an la chang a ni.

Hemi avang hian Rashford hian mipui leh sawiseltute lakah sawiselna a tawk chho mek a, mahse Manchester United star hlui Teddy Sheringham chuan he forward-a khelh dan leh theihna thehchhuahah hian sawisel tur a awm loh thu a sawi ve thung.

Hajper aiawha United In Focus nena an inkawmnaah Sheringham chuan, "Marcus Rashford hi tun season-ah a vannei lo mai chauh a ni. Theihtawp a chhuah tih a chiang hle. Tun dinhmunah chuan Manchester United buaina ber a ni lo. Ka thil hmuh aṭang chuan a rilru a pe tawk hle a, a nih dan tur reng pawh a ni," tiin a sawi.

Rashford-a'n khelmualah rilru pe takin khel mah se, Sheringham chuan hetianga a awm avang ringawt hian fak chiam a phu chuang lo tih a sawi bawk. Sheringham chuan, "Professional footballer a ni a. Rilru ṭha tak a pu e tiin a hnungzanga ben thek thek a, 'i ti ṭha e' tih vel kan sawi buai a ngai lo. A nihna takah chuan chutiang mize ṭha chu a tir aṭanga a neih sa ngei ngei tur zawk a ni," tiin a sawi belh a ni.

Old Trafford-a a kir leh hnuah Rashford-a khelh chhiat ber ṭum chu Craven Cottage-a Fulham nen 1-1 a an inhnehtawk ṭum kha a ni a. Tun hnaia ram aiawha inkhelh chawlh (international break) an neih lai khan a club khelhpui Kobbie Mainoo nen England squad aṭangin an inhnukdawk a, inkhel lovin an chawl rih a ni.

United hian mahni mualah Tottenham Hotspur an hmachhawn leh dawn a, Spurs lakah hian Rashford hian a career chhungin goal ruk lai a lo khung tawh a ni. An laka goal a khung hnuhnun ber chu kum 2024-a 2-2 a an inhnehtawk ṭum kha a ni. Chak leh ngei duha tuihal United tan chuan Spurs laka point khat hmuh ringawt chu a tawk dawn lova, chak ngei tura ṭan an lak a ngai dawn a ni.