Manchester United manager ropui Sir Alex Ferguson chuan kum 85 a tlin dawn hnaih mekin, thluaka thisen chhuak (brain haemorrhage) vanga zai a nih hnu leh, emergency surgery an neih zawha ṭawng thei lova a aw a hloh dan te bakah, Old Trafford-a a vawi khat kir lehnaa a hlauhthawn dan te chu BBC Breakfast hnenah a sawichhuak.
Kum 85 tlin nan thla thum chiah a mamawh tawh lai hian, May 2018-a zai a nih hnu thla li-naa Old Trafford-a Manchester United leh Wolves inkhel en tura a kir leh ṭum chungchang sawiin, Ferguson chuan, "Ka hlau takzet a ni," tiin a sawi chhuak. Manager hlui hian a nun leh a career chher chhuaktu match pawimawh tak tak leh thutlukna a lo siam tawhte pawh a sawi lang bawk a ni.
Directors' box-a a kir leh ṭum khan khelmuala ṭantute'n engtin nge an lo dawnsawn ang tih a hre lawk lo a. Mahse inkhelh ṭan hmain amah leh a nupui Cathy te chu mipui zawng zawng ding chunga an lo chawimawi (standing ovation) avangin, Old Trafford-a a mimal nun tana hun pawimawh tak chu a nghawng a na zual hle a ni.
United manager hlui chuan tun dinhmunah hliam tenau a neih bak chu a hriselna a ṭha thawkhat viau tih a sawi a. Mahse zai a nih hnu ni tlemte chhung kha chuan a aw a hloh a, a ṭawng thei lo a ni. "Ka aw ka hloh a, ka ṭawng thei lo," tiin operation an neih zawh hlim chhawn chungchang chu Ferguson chuan a sawi a. Therapist pakhat chuan sava te, ran te leh luipui hmingte ziak chhuak tura tirin a enkawl a, chu zirlai kal tlang chuan a aw chu a rawn nei let leh ta a ni.
He inkawmna hi Ferguson-a lehkhabu thar 'Games of My Life' tih chhuah nena inzawm a ni a, he lehkhabuah hian a player hun lai leh manager a nih laia match pawimawh bik 21 chanchin a chuang a ni. BBC chuan he lehkhabu hi Glasgow khawpuia inhlawhfa chhungkua aṭanga lo seilianin, United nena English football leh Europe khawmualpuia an lal lai chanchin thuk zawk pholanna a nih thu an tarlang.
Thluaka thisen a chhuah lai hian Ferguson hi inkhelh a chawlhsan aṭangin kum nga a liam tawh a. Kum 1986 aṭanga 2013 inkar chhung khan Old Trafford-ah kum 26 chhung zet mawhphurhna lain, nomawi 38 ngawt a chawi a, chung zingah chuan Premier League title 13 leh Champions League nomawi pahnih te pawh a tel a ni.
Ferguson chuan a hlawhtlinna phena thutlukna harsa tak tak a lo siam tawhte pawh a sawi chhuak bawk a. St Johnstone-a hun harsa a hman lai khan football chawlhsana Canada rama pem daih te a lo rilruk hman hial a, mahse khawsik hri laka an buai laia kum 1963-a Rangers an hmachhawn ṭumin bul an ṭantir hlauh a. Khami ṭum khan kum 21 mi Ferguson hian hat-trick khungin a football career chu a nung thar leh ta a ni.
Inter Milan lamin an dawrna chu £7m aṭanga £7.5m-ah an tihsan hnuah Paul Ince a hralh dan te pawh a sawichhuak a, manager te chuan thutlukna khirh tak tak siam a ṭul ṭhin tih a tarlang. Ince-a chungchangah vawikhat "big-time Charlie" tia a lo koh tawh chu a inchhir thu sawiin, a hnuah chuan inrem leh tawhin ṭhian ṭha tak an nih chhoh leh thu a sawi bawk.
Kum 1990 chho vela United rawlthar theihna sang tak takte laka rinna a nghah dan pawh a sawi lang a. Ferguson chuan chung player-te chuan chak duhna neiin club thlarau an rawn ni chho tih sawiin, "Player naupangte lakah rinna ka nghat tlat ṭhin, a chhan chu hunṭha i pek chuan thil pahnih a thleng ṭhin—star dik takah an chhuak a, manager i nihna angin i lakah an rinawm tlat bawk ṭhin," tiin a sawi bawk a ni.
