"Cristiano Ronaldo, Wayne Rooney leh Carlos Tevez te chu player ropui tak an ni tih ka hria, mahse he hmun thleng tur hian theih tawp ka chhuah ve a ni. Ka theihna ka pholang ngei ang," tiin December 2008-a Manchester United-a a luh fel hnu khan Manucho chuan a lo sawi chhuak tawh a ni.
Carrington-a chawlhkar thum chhung trial a neih laiin Rio Ferdinand leh Nemanja Vidic te lakah pawh zam lovin theihtawp a chhuah a, trial a neih hlawhtlin hnuah United chuan he Angolan striker lakluhna thu hi an puangzar a ni. Sir Alex Ferguson-a assistant Carlos Queiroz-a'n he Angola forward theihna en tura a nawr hnuah, United hian thla eng emaw zat chhung an lo thlithlai tawh bawk a ni.
Ferguson chuan, "Manucho hi trial nei turin kan kawl a, contract ziahpui tlak khawpin a che ṭha a ni. Forward palian, che zangkhai leh tlan chak tak a ni a, Carlos-a inlaichinna neih aṭangin kan hmu thei ta a ni," tiin a lo sawi tawh a ni. Kar tlemte chhungin kum 24 mi hi Angola aṭanga lak chhuah niin England-a club lian ber nena contract ziah theihna hun remchang a nei zui ta a ni.
Khatih hun lai khan striker Louis Saha-a fitness chungchanga ngaihmawhna a awm avangin United hian back-up striker an mamawh hle a, Africa Cup of Nations (AFCON) inelnaa a chet ṭhat hmain Ferguson hian contract ziahpui hman a duh a ni.
He tournament-ah hian Manucho chu player langsar berte zinga mi a rawn ni chho ta reng a. Angola opening match-ah South Africa laka goal khungin an inhnehtawk a, chumi hnuah Senegal 3-1 a an hneh ṭum khan goal hnih a khung leh bawk. Angola chu quarter-final a thlenpui a, quarter-final-ah champion ta Egypt lakah 2-1 a an tlawm ṭum pawhin goal a khung leh bawk a ni. AFCON-ah goal li khungin inelnaa Best XI-ah thlan a ni ta hial a ni. Samuel Eto'o-a'n goal nga a khung chungin Manucho hian Best XI-ah a khum a, Didier Drogba pawhin Ivory Coast tan goal thum chauh a khung thei thung.
Manchester Evening News chuan chanchinbu hmaiah tarlangin, "Sir Alex Ferguson chuan player lak thar Manucho hmangin lunghlu dang a chhar chhuak leh ta niin a lang. He Angolan striker hian Africa Cup of Nations chu a chawikang hle a, Didier Drogba, Samuel Eto'o leh Michael Essien te ang star lian tham awmna inelnaah a langsar zual a ni," tiin an ziak hial a ni.
Ferguson pawhin fak zuiin, "Player theihna tehfel hi a harsa ṭhin, mahse theihna ṭha tak a nei a ni. Theihna tha a nei a, siamṭhat theih a ni bawk. Work permit kan hmuh theih chuan a hmabak tur kan ruahmansak thei ang," tiin a sawi bawk.
Mahse, he lakluhna hian beisei a phak ta lo. Angola aṭanga a luh hnu thla 18 chhungin United tan vawi thum chauh a inlan a, minute 42 chauh khelmualah hun a hmang hman a ni. Ferguson-a sawi tawh work permit buaina chu a chhan lian tak a ni a, Home Office lamin a tira an dilna an hnawlsak avangin thla ruk chhung Greek club Panathinaikos-ah loan-in an chhuahtir a ngai ta a ni.
Panathinaikos-ah hian match kua a inlanah goal li a khung a, mahse inkhelh tam a phu tawk lo niin a inhre thung. United-in 2007-08 season-ah Premier League leh Champions League nomawi an chawi zui a, Manucho pawhin work permit chinfel a, khelmuala inlan a chak tawh hle. Nipui lai khan a work permit chu pawm a ni ta a, United Chief Executive David Gill pawhin phur takin a lo lawm bawk.
Mahse metatarsal hliam a tawrh tak avangin Ferguson-a tlarhmaa inkhelhna hmun chang tura theihna phochhuah theihna hun ṭha a hloh a. September 2008 khan Carling Cup-ah Middlesbrough lakah Ryan Giggs-a thlakin debut a siam a, Stoke leh Blackburn lakah substitute-in a inlan leh bawk.
Inkhelh tam duhtu Manucho tan hian Old Trafford kawng a ping chho hle a, January transfer window-ah relegate loh tuma bei Hull City chuan thla ruk loan-in an lalut ta a. Hull tan hian match 17-ah goal hnih khungin, Fulham laka hun tawp bera chakna goal a khung chu a ropui zual a, Hull hian season tawp niah relegation an pumpelh theih phah ta hial a ni.
