Manchester United Women chuan Scott Rogers-a thlaktu turin Spanish coach Jose Herrera chu assistant head coach atan an ruat fel ta. Herrera hian head coach Eva Olid-i thawhpui coach Gavin Beith leh Dan Bale te finin, first-team coaching staff a rawn zawm dawn a ni. Club lam pawhin he inthlakthlengna hi an nemnghet tawh a, kum 2025 aṭanga assistant manager hna lo chelh tawh Rogers hian United a chhuahsan zui ta a ni.
Eva Olid-i hnuaia United coaching kalphung hi a nghet chho mek a, Olid-i hi first-team manager a nih angin, Herrera hian squad enkawl kawngah a pui bawm ber dawn a ni. Kum 36 mi Herrera hi kum 16 a nih aṭanga coaching hna lo thawk ṭan tawh niin, UEFA Pro Licence nei a ni bawk. Kum 2019 khan Málaga CF Femenino head coach a lo ni tawh a, 2020 khan Granada zawmin, hemi hnu hian UD Tenerife-ah season thum chhung a awm a; Tenerife-ah hian a tirin assistant coach niin kum 2023 khan head coach hna a chelh zui a ni.
Hemi hnu hian 2024-25 season chhung khan Saudi Arabia club Al-Hilal Women a enkawl leh a, January 2026 khan Atlético Madrid women’s team enkawl tura ruat a ni. Atlético hi Copa de la Reina final a thlenpui a, final-ah hian Barcelona lakah 1-3 a an tlawm hma zawng kha chu sulhnu ṭha tak a nei hman a ni. Hemi hma, kum 2025 Champions League last 16-ah khan Herrera-a enkawl Atlético hi aggregate-ah Manchester United lakah 5-0 ngawtin an lo tlawm tawh bawk a ni.
Herrera-a'n United a rawn zawm lai hian team boruak a ṭha chho ṭan mek a ni. Pre-season-ah vawikhat mah an chak loh hnuah, United Women hian league match hmasa pahnihah London City Lionesses leh Chelsea te an hneh lo a, bul an ṭan chhe hle a nih kha. Mahse chumi hnuah insiamṭhain Arsenal nen an inhnehtawk a, chumi chhunzawmin a zawnin match thumah hnehna an chang zui ta a ni.
He an hnehna chan zawn zingah hian Sheffield United 10-1 ngawta an sawp bakah, Players’ Cup-ah Durham chu 5-1 zetin an sawp bawk a. Hetianga hnehna ropui tak an chan hlim laia Herrera-a'n team a rawn zawm thei hi thil lawmawm tak a ni a, boruak ṭha sa leh inrintawkna nei chho mek team a rawn enkawl dawn a ni. Arsenal laka point an hmuh aṭanga che ṭha chho United Women hian hma an sawn zel theih nan Herrera-a tawnhriat neih ṭhat hi an chhawr ṭangkai hle tura beisei a ni.
