Manchester United legend Paul Scholes chuan thutlukna siam theihna nei se, an captain Bruno Fernandes leh defender Lisandro Martinez te chu hmun danga hralh chhuah nghal a hreh loh tur thu a sawi.

Kar liam taa Champions League match-ah United hi Italy club Como lakah 4-1 ngawta an tlawm hnuin, kum 32 mi Fernandes hian head coach Michael Carrick leh a coaching staff-te ruahmanna (tactics) hmante chu tlang takin a lo sawisel a ni. He post-match interview-a a ṭawngkam hmante avang hian boruak a siam zui nasa hle.

A ṭawngkam avang hian Pathiannia Premier League match-ah Carrick chuan an captain hi a tir aṭangin chhawr lovin bench-ah a ṭhut tir a. Old Trafford-a Bournemouth laka 3-0 ngawta an tlawm ṭum hian Fernandes hi second half-ah warm-up tiin inbuatsaihnate nei mah se, Carrick chuan mual chhunga luhtir a tum ta lo a ni.

'The Good, The Bad & The Football' podcast-a a sawinaah, Scholes chuan Fernandes leh Martinez te chu thutlukna siam thei a nih chuan chhuahtir nghal mai a peih tur thu a sawi a. "Kar liam taa Bruno Fernandes-a thil tih kha chu ngaihdam theih a ni lo," tiin a sawi.

Chutih rualin, Argentina international Lisandro Martinez chungchang sawi zui lehin Scholes chuan, "Martinez-a thusawi pawh kha a dik lo ka ti hran lo, mahse a buaipui tur thil a ni lo. Ani nen inzawmna pakhat mah a nei lo," tiin a sawi bawk. Kum 28 mi centre-back Martinez hian tun thla tir lam khan interview-ah Ineos leh United director of football Jason Wilcox te a lo sawisel tawh a. Hemi hnu hian social media hmangin ngaihdam a dil a, chawitir (fine) a nih hial phah bawk a ni.

United player hlui Nicky Butt pawhin Fernandes-a chet dan chu pawi a tih thu a sawi ve bawk. Butt chuan, "Kum 12, 13 liam ta chhung khan he club tana khelh awmzia hria leh phurrit phur ngam awmchhun a ni ṭhin a. Goal a khung a, midang atan a siamsak a, club tan a ṭang a ni. Mahse interview pakhat lek avangin a hmingṭhatna a tichhe vek a ni. A a lutuk hret," tiin a sawi.

Scholes leh Butt te hian Carrick-a thlaktu tur atana mi hrang hrang an sawi zinga Eddie Howe chu hnawlin, an captain hlui Roy Keane chu he hna chelh tur hian an duh zawk thu an tarlang tel bawk a ni.

Manchester United hi Inrinni tlai dar 12:30 (UK time)-ah Stamford Bridge-ah Chelsea an luhchhuah ang.