Manchester United-in 2026-27 season ṭan tirah match pariat aṭangin point sarih chauh an hmuh avangin, an head coach Michael Carrick-a dinhmun a derthawn hle a, club hotute pawhin head coach thar ruat an rilruk mek nia ngaih a ni.
United player hlui Nicky Butt leh Paul Scholes te chuan 'The Good, The Bad & The Football' programme-ah Carrick-a thlaktu tur hming 11 chhawp chhuah zinga candidate hrang hrangte chungchang an sawi dun a. Mahse, he hming 11 zinga pathum (3) chauh ah hian ngaihdan thuhmun an nei thei a ni.
He Class of '92 member pahnihte hian Eddie Howe lakluh chu an duh lo ve ve a, an captain hlui Roy Keane erawh chu Manchester United enkawltu atan thlangin, he hna chelh tur hian an duh dun hle thung. Chutih laiin Antonio Conte, Gareth Southgate, Fabian Hurzeler leh Mauricio Pochettino te chungchangah erawh ngaihdan in-ang lo neiin an ngaihdan a inthlau hle a ni.
Bournemouth laka an tlawm hnu khan Carrick-a hi chawpchilh taka ban mai tawh tura ngaihna a lian hle a. Ineos hotute hnuaiah kumin tir lam khan Ruben Amorim an ban khan ruahmanna dang awm hleinem tiin Carrick-a hi an lo ruat ta ngawt a ni. Tun kar tawpah Chelsea an hmachhawn dawn avangin caretaker emaw interim manager ruat nawn leh tawh lovin, manager nghet lakluh ngei an tum tawh nia hriat a ni.
Scholes leh Butt-a te ngaihdan in-kalh tak hian United board room chhunga hruaitu lian te rilru buai dan tur pawh a tilang chiang hle. Bournemouth laka an tlawm hnu hian thutlukna siam mai lovin, Chelsea match hmaa an manager thar tur hi zawn fel hman ngei an tum ruh hle a ni.
