Como laka 4-1 a an tlawm hnu leh mahni mual Old Trafford-a Bournemouth laka 3-0 ngawta an tlawm tak avangin, Manchester United head coach Michael Carrick-a dinhmun chu a derthawng takzet ta. Thla reilote liam ta khan kum hnih daih contract ziahpui ni mah se, kumin mualpho taka kar khat an hman liam tak avangin a hna aṭanga hlih a nih a hnaih hle a ni.
Thawhṭanni khan United hotu lian Omar Berrada leh Jason Wilcox te chu Carrington-ah an thleng a, Carrick-a hmabak chungchangah inbiakna pawimawh (crisis talks) an nei ta a ni. A bikin Inrinni laka an tlawm dan hian stadium chhung leh a pawna thawktute ngaihdan a tidanglam hle a, Carrick-a chhuah tur thu hi thil thleng ngei ngei tur angah mi tam takin an ngai tawh a ni. Tun kar tawpah Stamford Bridge-ah Chelsea an pan a ngai dawn bawk nen, United hotute hian hma an lak vat a ngai dawn a ni.
Manchester Evening News writer-ten Carrick-a thlaktu tur atan tute nge ṭha ang tih an sawi hmang te:
Unai Emery: Aston Villa-a kum engemaw zat hlawhtling taka a enkawl tawhna avangin Emery hi lakluh tum tura duhsaktu an tam hle. PSG leh Arsenal-a a lo enkawl tawhna avanga zawhna awm thei bawk mah se, Europa League nomawi vawi tam lo chawitu leh Villa top-four-a inhlangkai tu a nih avangin club lian enkawl tlak tak nia ngaih a ni. Mahse hetiang a nih chuan hun peka transfer window engemaw zat chhung a duh zawng player lakluh phalna pek an ngai thung ang.
Mauricio Pochettino: Tottenham Hotspur lo enkawl tawhtu Pochettino pawh he hmunruak luah thei tur zinga duhsak hlawh tak a ni. Premier League leh Champions League final-ah Spurs a lo thlenpui tawh a, squad mumal tak pawh nei lo chunga hetiang dinhmun a thlenpui thei hi fak a hlawh hle. US ram tana World Cup a enkawl zawh hnuah Old Trafford pan hi a hnawl a rinawm loh a ni.
Eddie Howe: Newcastle United boss hlui Howe hi Dan Ashworth-a'n a lo rawt tawh ṭhin a ni a, boardroom-a a thlawptu awm mek bawk an ni. Mahse Newcastle-a a hun tawp lamah khan a fatigue hle a, player te pawh an khelh ṭhat tawh loh hnuah pawh a tan tlat ṭhin nia sawi a awm avangin zawhna a awm ve tho a ni.
Antonio Conte: Tactical hmanga inthlakthlengna siam zung zung thei leh player-te thunun hneh tak a nih avangin, mi strict tak buaipui ngai United team tan hian tura duhsaktu an awm bawk. Julian Nagelsmann leh Como coach Cesc Fabregas te pawh thlan theih zinga mi angin an hming a ri tel bawk a ni.
Mahse, analyst leh writer ṭhenkhat chuan manager inthlak hret hret hian United buaina hi a chinfel vek an ring lo. Club executive leh recruitment lama thutlukna siamtute lam an inthlak a, ruahmanna nghet tak an siam loh chuan manager thar pawhin harsatna lian tak an hmachhawn zel zawk ringtu an awm bawk a ni.
