Michael Carrick chuan Manchester United training ground-ah darkar thum vel chiah hun a hman hnuah, tlai dar 5:00 khan Carrington a chhuahsan ta a ni.

Kum 45 mi head coach hi chawhnu dar 1:50 khan a rawn thleng a, inkharkhipa (behind-closed-doors) Under-21 ten Hull City an hmachhawnna match a thlir hnuah, United academy-a awm mek a fapa Jacey nen darkar thum leh minute 10 hnuah Carrington hi an chhuahsan leh a ni.

Tun season bultannah United hi an che chhe hle a, inelna hrang hrang match 12 an khelh tawh zinga pahnih chauh hnehna an la hmu a, a zawnin match riat chhung hnehna an chang tawh lo a ni. Champions League-ah Como lakah leh Premier League-ah Bournemouth lakah 3-0 ve ve a an tlawm zawn tak avang hian, Carrick hi hna aṭanga hnawhchhuah a ni dawn nge dawn lo tih a la chiang lo a ni.

Carrick-a hmabak chungchang sawiho tur hian United director of football Jason Wilcox leh chief executive Omar Berrada te pawh zingtian dar 9:00 hmain Carrington-ah hian an rawn thleng a. Chhun chhung zawng khan Carrick-a hmabak hi sawiho niin, Director of football Wilcox pawhin tlai lamah khan training ground hi a chhuahsan ve zui bawk.

Bournemouth laka 3-0 a an tlawm ṭum khan Old Trafford-a púngkhawm United fan-te chuan an ngaihdan an phochhuak chiang hle a. Carrick-a hming au chhuahpuiin thlawpna an lantir a, chutih laiin club hotute Wilcox leh Berrada te lakah erawh an lungawilohna lantirin au elna an puahchhuah a, inkhelh zawhah player-te pawh an au el (booed) bawk a ni.

Bournemouth an hneh loh hnu khan hna aṭanga hnawhchhuah a inbeisei em tih zawhna chhangin Carrick chuan, "Thil thleng mek hi ka hrethiam em em a ni. Sawi bik a hrangin inbeisei em em pawh ka nei lo. Pangngai takin ka tihtur ka ti chhunzawm zui zel a, he club hi ka hmangaih em em tih in hria a ni. Eng thutlukna pawh siam ni se, club tana ṭha ber tur a nih chuan ka pawm vek ang. Keimah lamah chuan thutlukna engpawh a thleng a nih pawhin ka pawm thlap dawn a ni," tiin a sawi.

Carrick chuan mawhphurhna a lak tur thu sawi chhunzawmin, "Mawhphurhna zawng zawng hi ka chungah a awm a ni. Hei hi ka sawi tawh a, ka pawm bawk. Chak emaw, tlawm emaw, inhnehtawk pawh ni se, club chhunga thil thleng zawng zawngah mawh ka phur ang. He dinhmunah hian ka awm avangin ka mawhphurhna ka hria a, he dinhmun hi ka zah em em a ni. Tun dinhmunah chuan thildang sawi vak tur ka nei lo," tiin a sawi zui a ni.