Manchester United head coach Michael Carrick chu a hna aṭanga ban a nih mai tawh beisei a nih laiin, Thawhlehni zing khan Carrington training ground-ah a va thleng.

Kum 45 mi Carrick-a hma hun hi a derthawng hle a, United chief executive Omar Berrada leh director of football Jason Wilcox te chuan coaching staff-ah inthlakna siam mai turin an rawt nia tarlan a ni. Manchester Evening News (MEN) thudawnna chuan club hotute hian buaina thleng meka United chhuahpui thei turin he English manager lakah hian an rinna an hloh tawh tih an sawi.

Ram aiawha chhuak lo Manchester United player-te leh Carrick te hi Thawhlehni hian Carrington-a inlar tura ruahman sa an ni a, head coach hi zing dar 7:15-ah a thleng a ni. A tirah chuan zing dar 7:30 bawr velah a thleng ṭhin a, mahse pressure a san chhoh tak avangin tun hnaiah erawh a rawn thleng hma zawk ṭhin nia tarlan a ni.

Pathiannia Aston Villa nen goal 4-4 a an inhnehtawk tak avangin, United hian tun season Premier League match 10 an khelh tawh chhunga game khat chauh an la chak avangin international break chhung hi relegation zone-ah an hmang dawn a ni.

Kar hnih liam ta khan Como leh Bournemouth te laka goal thum faia an tlawm zawn avangin Carrick hi ban ṭep a lo ni tawh a, mahse club hotute lakah a theihna phochhuahna hun ṭha pek leh a lo ni a. Hemi hnu aṭang hian an khelh dan phungah hmasawnna tlem awm deuh mah se, club hotute hminna tak tak an la hmu lo a ni. Chelsea an hneh loh ṭum khan first half-ah ṭha takin an khel a, Champions League-ah Roma 2-0 a an hnufual hnuin an rawn kir leh a, an hneh a nih kha. Villa laka an inkhelhah pawh 2-0 leh 4-2 a an hnufual hnuin harsa takin 4-4 in an inhnehtawk hram a ni.

Mahse, heng match thum chhung hian goal 8 ngawt an chhuah thung a, Berrada leh Wilcox te chuan Thawhtanni khan inbiakna neiin, Carrick-a'n dinhmun a siamṭha thei tak tak dawn em tih an sawiho ta a ni.

United-ah match 32 a enkawl hnuah Carrick hi ban a nih a rinawm ta hle a, a thlaktu tur zawn hna pawh kalpui mek a ni a, USA boss Mauricio Pochettino chu he hna chelh tur hian rin ber a rawn ni chho ta a ni. Pochettino hi international break chhung hian USA team enkawlin match hnih hmachhawn tur nei mah se, he Argentine coach contract-ah hian lei chhuah theihna clause a awm avangin United tan lakluh an duh a nih chuan thil a awlsam dawn a ni.