Aston Villa chuan manager Michael Carrick-a thlaktu atan an manager Unai Emery lakluh tumna engmah a thleng dawn lo tih Manchester United hnenah fiah takin an hrilh ta.

Kum 54 mi Spaniard hi Carrick ban a nih hlauhva United hotuten a thlaktu atana an ngaihven ber pakhat ni mah se, Emery hi Villa Park-ah contract long-term thar ziak turin inremna an siam hnai ta zawk a ni.

Thawhlehni zan khan Old Trafford-ah Manchester United chuan Champions League-ah AS Roma chu 2-1 in an hneh a, tlawm zawk aṭanga rawn kir lehin Carrick-a chunga pressure thleng mek chu a ziaawm phah deuh a. Pathianni tlaiah hian Emery leh a pawlte hi Manchester United khelmualah kalin Premier League match pawimawh tak an hmachhawn zui dawn a ni.

Villa hi an match hnuhnung pahnihah an che ṭha tawk lo a, mahni mualah Fulham nen 1-1 in an inhnehtawk hnuah khualmualah Barcelona laka 2-1 in an tlawm a ni. Tun kar chhunga an chet dan hi duhtusam ni chiah lo mah se, kum 2022-a club a zawm aṭangin Emery-a'n Villa dinhmun a chawisang hle tih chu fiah tak a ni.

Hemi avang hian Villa hotute chuan hun rei tak chhung club-ah hian chelh zui an duh a, Nilaini khan club hotu liante chuan a hmakhua leh hma hun chungchang sawiho nan meeting pawh an nei nghal a ni.

Club thuchhuah nemnghetah Villa chuan Emery, Chairman Nassef Sawiris, President of Football Operations Roberto Olabe leh Director of Football Operations Damian Vidagany te inkarah "inbiakna ṭha tak" a awm tih an tarlang.

Aston Villa thuchhuah chuan, "Aston Villa chuan club hmakhua ruahman nan leh hun rei tak chhunga intlansiakna leh inrelbawlna pui zawk siam nan vawiin khan meeting pawimawh tak a nei a. He meeting-ah hian club Chairman Nassef Sawiris leh Unai Emery te bakah President of Football Operations Roberto Olabe leh Director of Football Operations Damian Vidagany te an inhmukhawm a ni.

"Inbiakna hian club-a hun rei tak chhunga strategic direction duang dun tura rilru hmangin, inbiakna ṭha tak avangin Unai Emery-a hruaina hnuaiah kum 2029 thleng pawh pel daih turin club hmakhua pui zel tura inremna fiah tak siam a ni a. Hei hi hma sawn zel leh tum sang tak thleng tura duhdan inang tak tlawhchhana siam a ni. Kan thiltum chu a chiang hle: chona lian ber berte hmachhawn thei tur Aston Villa ropui leh elnaupuk tak din a ni," tiin a tarlang.

May 2024 khan Emery hian Aston Villa-a a luh aṭanga thla 18-naah kum nga daih contract pawhsei an lo ziahpui tawh a, mahse tunah hian kum som thar thleng pawh an enkawl chhunzawm zel dawn nia hriat a ni.

The Telegraph-in a tarlan danin, Emery hi Villa nena contract thar ziah chungchangah inbiakna thui tak an nei tawh a, hei hian United nena an sawizawmna chu a titawp ruih dawn a ni. United hian a contract neih lai chhut chatin la duh ta se, release clause atan £20million ngawt an sen a ngai dawn a ni.

Villa leh Emery te hian inrintawkna nei thar Old Trafford an pan dawn a, Carrick-a tan pawh chakna dang hmuh leh a nih chuan, international break liam thleng tura a dinhmun a nghet zui thei dawn tihna a ni a, hetih hunah hian a chet dan endikna (review) ruahman a lo ni tawh bawk a ni.