Manchester United-in season bul an ṭan ṭhat loh em avangin Glazer chhungkua leh Ineos te club enkawl danah ṭantute an lungawi lo hle a, Old Trafford lamah neitu thar thlak ngenna a ring chho hle a ni. Relegation zone hnaihah awm mek mah se, Thawhlehnia Champions League match-ah Roma lakah comeback ropui tak hmangin hnehna an chang a, he match-ah hian United ṭantute chuan khelmual chhunga tennis ball vawm lutin an aupui a ni.
United enkawltute laka fan-te an lungawi loh chhoh zel lai hian, Liverpool leh Sunderland striker hlui Djibril Cisse chuan Sir Jim Ratcliffe-a pawhlut Ineos group leh Glazer-te thlaktu atan club legend David Beckham chu a rawn rawt a ni. Kum 45 mi Cisse hian Beckham-a'n Inter Miami-a neitu pakhat (co-owner) a nihna anga a hlawhtlinna chuan United hi harsatna aṭanga a kaichhuak thei dawn nia a rin thu a sawi.
Cisse chuan Mr Gamble hnenah, "David Beckham hian Manchester United-ah Glazer-te leh INEOS hi a thlak thei angem? A thlak theih lohna chhan tur a awm lo. Inter Miami-ah hna ṭha tak a thawk mek a ni. Amah hian mawi tak a nei a, hming lian tak nei niin David Beckham a ni a, khawvel football-ah hruaitu lian a ni. Chuvangin, a thleng thei tur a ni," tiin a sawi.
Beckham-a'n club neitu nihna a lakluh a nih chuan, he French striker hian kum 15 chhung enkawltu hna thawk tawh lo mah se, a club khelhpui hlui leh legend Roy Keane chu manager atan ruat se a duh hle a ni. Cisse hi Sunderland-a a awm laiin Keane-a hnuaiah a lo khel tawh ṭhin a ni.
Keane-a chungchang sawiin Cisse chuan, "Club legend dang rawn kir lehna tur a ni ang. Amah leh Roy Keane an nih dun ngat phei chuan a ropui ngawt ang. Keane hian tawnhriat leh chanchin mawi tak a nei a. Mize puitling tak nei niin club-ah hian hming lian tak a ni bawk. United-a an hun ropui lai khan kum tam tak armband a lo hling tawh a, chuvang chuan a rawn kir leh a nih chuan thil ṭha tak a ni ang," a ti.
Sunderland-a an thawhdun dan chungchang sawi chhunzawmin Cisse chuan, "A hnuaia hna thawh kha ka nuam ti em em a, a chhan chu midang sawi emaw ka mizia chungchanga mite titi aṭangin min teh ngai lo. Min ringam a, kan thawkdun ṭha hle a, a chhuah lai khan ka beidawng takzet a ni. Coach ka zah em em leh ka thawhpui nuam ka tih ber pawl a ni. Kan mizia a inang hle a, kan tlang a, thil kan sawi tlang tawp tawh chuan kan kalpel nghal mai ṭhin a ni," tiin a sawi bawk.
Old Trafford-a neitu nihna lakluh lamah Beckham-a tana hma lak a hnaih zawk hmel a, manager atana Keane-a rawn kir erawh thil thleng thei vak lo nia ngaih a ni. Irish manager hlui hian coaching-ah a rawn kir tawh miah lo ang tih tichiang lo mah se, a hma pawhin rawn kir chu thil thleng a nih chiah a rin loh thu a lo sawi tawh a ni.
