Real Madrid chuan Manchester United rawlthar, kum 16 mi JJ Gabriel chu Santiago Bernabeu-a lakluh theih nan ṭawngkain (verbal agreement) inremna an neihpui ta nia report a ni.

Spanish club lian Real Madrid hian hmakhua thlirin naupang theihna ngah tak tak lakluh an ruahman chho zel a, United academy-a rawlthar langsar berte zinga mi JJ Gabriel-a aiawhtute nen inbiakna ṭha tak an neih hnuah ṭawngkain inremna hi an siam thei ta a ni.

Gabriel hi Manchester United youth system-a talent zawng zawng zinga beiseina sang ber dawngtu pakhat a ni a. Season liam ta leh tun season chhung pawhin match hrang hrangah a che ṭha hle a, first-team training-ah pawh koh chhoh a lo ni tawh bawk a ni. Old Trafford-ah hmakhua ṭha tak a nei tura ngaih ni mah se, Real Madrid ang club lianin an ngaihven takah chuan he rawlthar hian Spain pan hi a thlang zawk nia tarlan a ni.

Thu dawn danin, inremna hi ṭawngka maia la awm a nih avangin contract puitling ziah a la ni rih lo a, transfer puitling a thlen leh thlen loh tur erawh official thuchhuah a la awm lo. Mahse, Real Madrid hotute leh player aiawhtute inkarah inrinna a awm ṭha hle a, Santiago Bernabeu lama a insawn theih nan hma an la zui zel dawn a ni.

Manchester United lam tan erawh he thil hi chanchin ṭha a ni lo hle. Old Trafford club hian an academy chhuak rawlthar ṭha tak takte chelh zel an duh a, Gabriel-a hma hun tur chungchangah pawh contract puitling ziahpui an lo beisei char char a ni. Mahse Real Madrid-in he naupang hi an rawn ngaihven tak avangin, United tan chelh zui reng chu thil harsa tak a ni thei dawn a ni.

Santiago Bernabeu lamah hian Gabriel hi a insawn a nih chuan, Real Madrid-in khawvel huapa rawlthar theihna nei ṭha ber ber lakluh an tumna hlawhtlinna dang pakhat a ni leh dawn a ni.