Manchester United goalkeeper hlui Peter Schmeichel chuan Champions League-a AS Roma laka comeback ropui tak an siam hnuin United player engemaw zat a lo inbiakpui tawh thu leh, Old Trafford boruak ropui tak chu chakna atan hmang zui zel tura a hrilh thu a sawi.

Michael Carrick-a enkawl United hi Roma lakah minute 18-na lekah goal hnih ngawt an phur hmasa a, mahse second half-ah che changtulin hnehna ropui tak an siam zui ta a ni. Minute 30 tling lo chhungin Bruno Fernandes-a'n penalty aṭangin goal khat a khung hnuah, Matheus Cunha-a'n goal hnih (brace) a rawn khung a, United hian he European clash-ah hian an dinhmun an ti-letling thawk a ni. Cunha pawh hian an chakna goal a khung hnuah mipuite zingah a zuang lut nghe nghe a ni.

Half-time a nih thleng khan mahni mual fan-te chuan an player-te chu an boo nasa hle a, mahse inkhelh tawp zai a an hlaunaah erawh an ding a, hlim takin kut an bawk thung a ni. Tun season-a United chakna zawng zawng hi mahni mual Old Trafford-a an hmuh vek a ni a, Schmeichel chuan player-te chu he mual boruak hi khingpuite tana ṭihbaiawm a nih theih nana hmang ṭangkai zel turin a chah a ni.

CBS Sports-a a sawinaah Schmeichel chuan, "Camera pawn lamah player engemaw zat chu ka lo be tawh a, dressing room nena kan inhnaih deuh vang a ni. An hnenah, 'Old Trafford-a European zan ropui tak boruak chu i tawng chho ta a - he rilru phurna hi thlathlam tawh suh u' tiin ka hrilh a ni," a ti.

Schmeichel chuan sawi zawmin, manager Michael Carrick pawh he boruak hmanga hmasawn zel dan tur a zawt a. Carrick pawh Old Trafford-a lo khel tawh a nih avangin he boruak pawimawhna hi a hre chiang hle a ni. Schmeichel chuan, "Khelmual an rah leh hunah player-te hian kha zan kha an hria ang a, 'Thawh hlawk zawk nan ka tlan a, ka tih ṭhin aia nasa ka chhuah khan, mipuite thawm min chawhpawha ka hmu a, hemi hi ka trawn nawn leh zel ka duh - he boruak nei tur hian a nih hi Manchester United ka zawm kher chhan,' tiin an ngaihtuah ngei ka ring a ni. Chuvangin mipui support ṭha tak leh Old Trafford boruak hi khingpuite tana hmeltma (enemy) ni tura hman dan zawng zawng chu player-te hian an thiam zui zel ka ring a, vawiinah pawh hian stadium-a mipui pungkhawmten team chak nan tha an thawh hlawk em em a ni," tiin a sawi.

Schmeichel-a'n khelmual boruak leh mipuite puihna an mamawh zia a sawi rual hian, Pathianni hian United chuan mahni mualah Aston Villa an mikhual dawn a ni. Unai Emery-a naute hi Thawhlehnia Champions League-a Barcelona laka 3-0 a an tlawm hnuah, a zawnin khualmual inkhel pahnihna an hmachhawn dawn a ni.

Villa hian Midlands lamah United laka sulhnu ṭha tak nei ṭhin mah se, September 2021 aṭang khan Old Trafford-ah chak a la nei miah lo a. United pawhin mahni mualah Villa hi a zawnin ṭum ruk ngawt an lo hneh tawh a ni. Kar liam taa Fulham nen an inhnehtawk hnuah, United hian Pathianniah hnehna an chang a nih chuan Villa aiin point pahnih chauhin an hnufual dawn ta a ni. Villa tan hian Matty Cash a inlan thei dawn lo a, kumin Premier League season-ah yellow card vawi nga a hmuh tlin tawh avangin hrem a ni.