UEFA Nations League inkhelah Portugal chuan Denmark chu 4-2 in an hneh a, match thum an khelh tawhah vawi thum hnehna changin bul an ṭan ṭha hle. He inkhelah hian Manchester United player pahnih an inlan bawk a ni.

Kum 2026 World Cup zawha Portugal head coach atana ruat Jorge Jesus chuan Manchester United captain Bruno Fernandes chu a khelh ṭhina No. 10 role-ah a khelmual luhtir a. Fernandes hian assist vawi hnih a neih hnuah, darkar khat a liam hnuin United fullback Diogo Dalot chu bench aṭangin a rawn lut ve leh a, ani pawh hian assist pakhat a rawn nei ve bawk a ni.

He match hi head coach Jesus nena an inbakkawlh hnuah Cristiano Ronaldo-a'n squad a chhuahsan hnua Portugal match hmasa ber a ni a. Ballon d’Or vawi nga dawng tawhtu Ronaldo-a kalsan tak captain armband chu Fernandes hian a banah a hling nghal a ni. Kar liam ta chhung khan Portugal hian Ronaldo tel lovin Norway leh Denmark te chu an hneh tawh a, Ningani zan inkhel zawha coach Jesus-a lungawi hmel hmuh chu thil mak a ni lo.

Match zawha chanchinbumite a kawmnaah, Jesus chuan second half-a che ṭha zawk em em Fernandes nena half-time laia an inbiak dan chu a tarlang a ni.

He inkhelah hian Joao Cancelo chuan Portugal tan hma a hruaipui a, mahse Denmark lamin Mikkel Damsgaard hmangin an siphurh an rawn rul thuai a. Hemi hnu hian Bruno Fernandes-a through ball ṭha zet aṭangin Goncalo Ramos chuan goal khungin 2-1 in hma a hruaipui leh a ni. Fernandes hian danglamna rawn siam chhunzawm zelin, ram tana a goal hmasaber khung turin Vitinha chu a siamsak leh a. A tawpah Dalot-a pass aṭangin Joao Felix chuan goal thun lehin 4-2 in hnehna an chang ta a ni.

Noticias ao Minuto tarlan danin, coach Jorge Jesus chuan Fernandes-a chungchang sawiin: "Bruno Fernandes hian first half aiin second half-ah khan a khel ṭha zawk hle niin ka hria. Half-time-ah khan team hian a theihna an mamawh lehzual tih ka hrilh a. He position-a khelte lakah hian beisei ka nei sang em em ṭhin a ni.

"Thil a kal tluang tawk lo a ka hriat chuan ka sawi chhuak mai ṭhin. Fernandes-a hnenah pawh khan, 'Nangmah ngeiin i ti a nih loh chuan, kan inkhel hi a famkim thei dawn lo,' tiin ka hrilh a. Second half-ah khan a rawn khel ṭha ta ngei reng a, Vitinha hnenah pawh pass ṭha tak a pe a ni. Tumah awm lohna anga lang mual awl lai (space) a chuh thiam em em a, khilai hmuna chet thiam kha thil pawimawh tak a ni. Second half-ah khan a ropui takzet a ni," tiin a sawi.

Jesus hi a player-te laka beiseina sang tak nei ṭhin coach a ni a, khelmualah thil ropui ti turin Fernandes-ah hian rinna a nghat ngam hle bawk. Portugal hian Pathianni zan hian Norway an hmachhawn leh dawn a ni.