Manchester United rawlthar beiseina sang tak nei JJ Gabriel-a'n club chhuahsan a duh thu a tarlan hnuah, German club lian Bayern Munich chuan lakluh tumin hma an la ṭan nia report a ni. Thla liam ta khan kum 16 mi forward hian United nena an contract neih lai tihtawp a, chhuah a duh thu a lo sawi tawh a, hei hian chanchinbu hmai a luah hneh hle a nih kha.
The Times-in a tarlan danin, Bundesliga champion hlui Bayern Munich hian May thla khan Gabriel-a chhungte nen inbiakna an lo nei tawh a ni. Thawhlehni khan Gabriel hian kum 16 a tling chiah a, EU passport a neih avangin Europe-a club dangte a zawm thei nghal dawn a ni. United Kingdom (UK) rawlthar dangte erawh kum 18 an tlin hma chuan ram dang club-ah an insawn thei lo thung. Bayern head coach Vincent Kompany chuan he rawlthar theihna hi a ngaisang hle a, an ngaihven zui hle nia tarlan a ni. Mahse, Gabriel-a aiawhtute'n kum khata hlawh tluklehdingawn (seven-figure salary) chuang an phut erawh Bayern hian pek an hreh deuh thung.
Gabriel-a'n United chhuahsan a dil chhan bul ber chu Champions League-ah Sabah an hmachhawn ṭuma first-team tana khelhtir an phut vang a ni. Head coach Michael Carrick-a hnuaia United hian Brighton & Hove Albion laka khelhtir an lo rilruk tawh a, mahse inkhelh hma chiah khan a aiawhtute hian chhuah an dil ta zawk a ni. United hian a contract tihtawp an remti lo a, chuvang chuan kumin nipui hian a contract a zawh hma chu England-a an elpui club dang a zawm thei rih lo a ni.
Spanish club lian pahnih Real Madrid leh Barcelona te pawhin he rawlthar hi lakluh tumin an inbe mek a. Gabriel pawh hian a hma hun a chian loh chhung hian Barcelona khawpui Castelldefels-ah training a lo nei mek a ni. Barcelona leh Real Madrid te hian kum 16 mi aiawhtute hi an be tawh a, Youth League-a Sabah laka hat-trick khung thei Gabriel-a chungchangah hian Barcelona sporting director Deco erawh a fimkhur hle thung.
Kum 18 hnuai lam player lakluh chungchanga dan awm avang hian United hian legal option hman theih dan an ngaihtuah mek a. Gabriel hi Europe-ah a insawn a nih chuan United hian zangnadawmna (windfall) £300,000 vel chauh an hmu dawn a ni. Chutih laiin, England chhungah insawn nise chuan zangnadawmna hi a tam tham hle thung ang. Entirnan, Chelsea aṭanga Rio Ngumoha a lakluh avangin Liverpool chuan tribunal thutlukna angin £2million chuang zet a pek a ngai a ni.
Manchester Evening News-in tun karah a tarlan danin, United hian zangnadawmna ṭha zawk an hmuh theih nan Gabriel hi scholarship terms chhawpsak an tum a. He forward lalut duhtu club chuan zangnadawmna bakah, rawlthar chherchhuahna, zirna, leh an hriselna lam thlengin mawhphurhna an la thei ngei a ni tih FIFA hnenah an fiah a ngai dawn a ni. Gabriel-a chhungte leh a aiawhtute erawh chuan heng harsatna awmte hi an paltlang thei ngei dawn tih an tichiang thung a ni.
