Manchester United first team tan minute khat mah la inlan lo mah se, rawlthar theihna ngah tak JJ Gabriel-a hmabak hian Europe chanchinbu hmai a luah hneh hle. Kumin nipui khan United chuan senior squad-ah sengluh ṭanin pre-season tour-ah an hruai a, Stockholm-a Atletico Madrid an hmachhawn ṭumin a inlan hman a ni. Season a ṭan hnuah pawh first team nen training nei chhunzawm zelin, United Under-21 tan a khel ṭhin bawk. Premier League 2-ah Ipswich Town leh Leicester City lakah goal hnih khungin assist vawi hnih a nei a, UEFA Youth League-ah Sabah FK lakah hat-trick ropui tak a khung bawk a ni.
Mahse chu match chu United tana a inlan hnuhnun ber a ni zui ta a. Sabah FK an hmachhawn ṭuma senior Champions League squad-a an telh loh avangin Gabriel-a aiawhtute chu an lungawi lo hle a, United chu club chhuahsan an duh thu an hrilh ta a ni. United chuan Carabao Cup-a Brighton an tum hunah Gabriel-a debut hi hlantir an tum viau laiin, he rawlthar hian Carrington chhuahsanin Castelldefels, Barcelona lamah mimal training a neihpui zui ta a. A kum a la naupan em avangin engmah tihchian theih a la ni lo va, mahse Thawhlehni khan kum 16 a tling ta chiah a ni. EU passport a neih bawk avangin European Union huamchhunga club-te chu a zawm thei tawh dawn a ni.
Barcelona sporting director Deco chuan Gabriel hi an bawhzui loh thu sawi bawk mah se, Barca bakah Real Madrid, Bayern Munich leh Paris Saint-Germain te chuan he rawlthar dinhmun hi an thlithlai reng nia hriat a ni a, England lamah Chelsea pawhin an ngaihven hle. He transfer boruak alh chho mekah hian a aiawhtu (agent) Ali Barat chu mi pawimawh ber a ni chho dawn ta a ni. Iran rama piang, London-a seilian Ali Barat hian transfer lian tham tak tak a lo buaipui tawh ṭhin a, kum 2025 nipui transfer bazar chhung ringawt pawh khan transfer vawi 15 zet a buaipui a, chung zingah chuan Bournemouth aṭanga Real Madrid pana Dean Huijsen-a insawnna leh Chelsea aṭanga Bayern Munich pana Nicolas Jackson-a insawnna te pawh a tel a ni.
Barat hian a agency Epic Sports kaltlangin Europe, Africa leh South America khawmualpuiah te scout neiin rawlthar ṭha tak tak an zawng kual reng a. Kum 2025-a Forbes magazine-in an kawmnaah Barat chuan a hna kalpui dan tarlangin: "Ka ngaihdan chuan football agent ṭha ni tur hian thil pathum a pawimawh ber a: ruahmanna (strategy), inrintawnna (trust) leh hlenchhuah theihna (execution) te an ni. Ruahmanna chu indawrna zawng zawng hi hun rei tak atana career duan chhuahna a ni tur a ni a, vawikhat transfer tihfel ringawt a ni tur a ni lo. Inrintawnna hi sum hlu ber a ni a, player, hralhtu club leh leitu club-te duhdan mil tura hma lak a, thutiam hlen ziah a ngai a ni. Hlenchhuah theihna chu pressure hnuaia inthunun theihna a ni a, boruak a san lai pawha inbengdaih a, hun pawimawhah thutlukna dik siam thiam hi a ni," a ti.
Barat chuan player chhungte nena inlaichinna nghet neih chu an hna bulthut a nih thu sawiin, "Player chhungkaw ngaihdan hi kan thutluknaah hmun laili ber a luah a, an rinna min nghah hi damchhung daih career siam nan a pawimawh ber a ni. Theihna nei chauh hi a tawk lova, player rilru puthmang leh an zia bakah an chhungte nen inrem takin ruahmanna kan siam dun ṭhin," tiin a sawi bawk. Gabriel-a pa Joe O'Cearuill (Republic of Ireland tana lo inlan tawh, kum 39 mi) pawh hian a fapa career-ah hian thuneihna lian tak a nei a, United nena an inkara boruak chhe chho ta pawh hetiang chhungkaw duhdan aṭanga intan nia sawi a ni. Gabriel-a chhungte hian Barcelona tana a khelh hi an suangtuahna ber a ni ṭhin a, United hi Gabriel-a tana a tawpna tur hmun a ni ngai lo hrim hrim nia hriat a ni bawk. Ruahmanna anga thil a kal loh takah chuan Barat leh a chhungte hian hmun dang pan an thlang ta a, United tan pawh he rawlthar chhuak tur hi dan theih rual a nih hmel ta lo a ni.
