Manchester United chu kawng engkimah hnunglam pan mekin an lang a, season liam taa Premier League-a pathumna dinhmun luah thei kha tunah chuan match ruk khelh hnuah 13-naah an tla thla der tawh a ni. Fan-te ngaihdan phei chuan hetiang dinhmuna an la awm thei pawh hi an vannei zawk hial niin an hria.

An chet chhiat zualpui ber chu mahni mualah chak la nei miah lo Tottenham Hotspur laka 1-1 a an inhnehtawk kha a ni. He inkhelah hian United hian 1-0 in hma an lo hruai ve hram hram a, mahse injury-time ah Spurs hian siphurh an rawn sut ta tho a ni. Tottenham hi mi 10 chauhva khel an nih zui bawk si avangin, hetianga point hloh hi United tan chuan tlawm tluk zeta na a ni. Inkhelh chhung zawng thlir phei chuan first-half zawhah 3-0 ngawta an phur lo kha United hi an vannei letling hle zawk a ni.

He inkhelh zawh hnu hian United fan-te chuan 'Talking Points' lamah an lungnihlohna an tarlang nasa hle a. Player-te khelh danah vui liam liam hlawm mah se, sawiselna tawng lian ber chu head coach Michael Carrick a ni thung. Fan pakhat chuan United season bul ṭan chhiat ber a nih thu sawiin, "United team-in season an ṭan chhiat ber ṭum a nih hial ka ring. Carrick-a dinhmun hi a derthawng ta takzet a ni," tiin a tarlang hial a ni. Statistical thil thlirin, Premier League hun laia match ruk khelh hnua United season ṭan chhiat ber a tling hial reng a ni.

Tun season an hmachhawn dawn khan Champions League khelh theihna hmun tal inchuh leh turin beiseina a sang hle a, mahse match ruk khelh tawhah vawikhat chiah hnehna an la chang a, chu an chak ve chhun pawh chu August thla daih tawha mi kha a ni tawh zawk.

January thlaa Ruben Amorim-a thlaktu atana Carrick an lakluh khan boruak a rawn thlak danglam nghal em em a, interim manager atana an beisei aia ṭhaa a chet avangin a ngheta ruat a nih kha thil awm tak a ni. Carrick hian United hi season liam ta khan pathumna a nihpui bawk a nih kha. Mahse tunah erawh chuan kum 2019-a Ole Gunnar Solskjaer-a'n interim aṭanga a ngheta hna a chelh hnua an tlakchhiat chhoh dan nen khan a inang hle tawh a ni.

Khatih hun lai khan Solskjaer-a naute kha an tla hniam zui nghal a, a hnuah rawn insiamṭha leh deuh mah se, kum hnih hnuah nomawi la thei lovin ban a ni zui ta tho a nih kha. Fan-te chuan Carrick-a United pawh hian chu kawng bawk chu an zawh leh mek niin an hria a, ṭhenkhat phei chuan heta ṭang hi chuan Carrick tan "kirlehna kawng a awm tawh lo" niin an ngai hial a ni.

Fan pakhat chuan, "Solskjaer-a hunlai kan thleng nawn leh mek a nih hi, bul ṭan ṭha em em, beiseina ruak siam, a tawpa che chhe em em bawk si; heta ṭang hi chuan kirlehna a awm tawh lo Michael. Club hi a buai nuaih a ni e," tiin a ziak a. Fan dang pakhat pawhin, "Carrick hi huaisenna leh fing taka khelh dan phung (tactics) siam theihna a nei tawk lo a ni. Carrick hian puitling taka hmachhawnin huaisenna a lantir a ngai. Chutiang a ti thei lo a nih chuan a dawhkan hi a tihfai (a chhuah) a hun tawh hle," tiin a tarlang bawk.

Fan dang lehin, "Carrick hi thil kal vel hian a bawhbuai (overwhelmed) hle a, a game tactics pawh a tir aṭangin a chhe tawh hrim hrim. Chak ngei ngei tur match-ah te draw kan nei zel a. Team hi kaihhruaina nei lo lawng ang mai an ni e," a ti bawk.

United hian hmabak khirh tak an nei chho mek a, an form ṭhat lai pawha hmachhawn huphurhawm tak tur, khualmualah a zawnin Atletico Madrid, Leeds United leh Como te an hmachhawn a ngai dawn a. Heng khualmual inkhelh thumte hian Carrick-a hmabak hi a tichiang ngei tura ngaih a ni.