Inrinni khan Old Trafford-ah Manchester United chuan khelmuala mi 10 chauhva khel Tottenham Hotspur lakah 1-1 in inhnehtawkna an nei a. Hmahruaitu zawk ni chung leh player tam zawk nihna remchang hmang ṭangkai zo lova hun tawp lama goal an chhuah leh tak avangin, head coach Michael Carrick chuan a player-te chu khelmualah fing (streetwise), luhlul leh paukhauh zawk turin a chah ta a ni.

He inkhelah hian minute 73-naah Bryan Mbeumo chuan United hmahruaina goal a khung a. Hemi hnu minute nga lekah Tottenham midfielder Rodrigo Bentancur chuan Luke Shaw chu a chal a tauh (headbutt) avangin red card pek a ni zui bawk. United hian goal khata hmahruai bakah player pakhatin an tam zawk bawk a, chak ngei tura ngaih an nih laiin hun pek belh (stoppage time)-ah Dominic Solanke chuan Spurs tan tauh lutin an siphurh a rawn sut ta hlauh a ni.

Inkhelh zawhah Carrick chuan an dinhmun chu sawifiahin, khingpui lamin player 10 nge 11 an kawl tih lam thlir lovin, hma an hruai tawh chuan inkhelh tawp thleng vawng nung thei tura game thunun thiam a ngai a ni tih a sawi. Khelmual chhungah ball possession vawn tluan te, khingpuite penalty box chhehvela ball thunun uluk te, an nawrletna tur danna kawnga fimkhur leh hun pawimawha tlarhnung venhim kawngah hmasawn an ngaih zia a sawi lang bawk.

Carrick chuan, "Hetiang dinhmun vawng nung thei tura theihna chu kan nei chiang alawm. Mahse hun pawimawh laiah hian tlem a zawnga khelmuala fin (streetwise) zawk te, luhlul zawk leh thil ṭhenkhat chinfel kawnga paukhauh zawk kan nih a ngai a ni," tiin a sawi.

United hian Premier League match ruk an khelh tawhah vawikhat chiah hnehna an la chang a, point 6 chauh hmuin table-ah 12-na dinhmun an luah mek a ni. Hei hi kum 1986-87 season hnua league match ruk khelh hmasaka an chet chhiat ber ṭum a ni hial bawk. Chu mai bakah, League Cup-ah pawh khan Brighton lakah 2-0 a hma an hruai tawh hnuin an lo tla tawh bawk a, hemi avang hian Carrick-a'n match thunun (game management) chungchang a sawi chhuahna hian awmzia thuk tak a nei a ni.

Carrick chuan a player-te lakah beidawnna a neih loh thu sawiin, player-te chu an inpe zo hle tih leh tihsual chu a thleng thei tih a pawm a, mahse point hmuh belh zel tur chuan rang taka insiamṭhat a ngai tih a sawi bawk.

Manchester United hian Thawhlehni hian khualmualah Champions League match pawimawh khel turin Atletico Madrid an hmachhawn dawn a, Carrick-a thil phut ang ngeia inkhel thunun theihna an neih leh neih loh chu fiah a ni ang.