Manchester United goalkeeper Senne Lammens chuan club tana Carlos Baleba-a debut match khelh dan chungchangah a ngaihdan a sawichhuak.

Inrinni khan Old Trafford-ah Manchester United leh Tottenham Hotspur te chu 1-1 in an inhnehtawk a, he match-ah hian Baleba chuan United tana a match hmasaber a khel ta a ni. Minute 73-naah Bryan Mbeumo chuan United tan goal a khung hmasa a, mahse stoppage time-ah Dominic Solanke chuan Spurs tan goal rawn khungin an siphurh a sut ta hlauh a ni.

First half laia midfield-a che buai deuh Youri Tielemans thlak turin second half-ah Baleba hi luh tir a ni a. He Cameroon international hian a theihna pholang turin hun a khawhral lo kher mai. Ball chhuhsak aṭanga a ṭhiante hnena pass kual leh zung zung te, chance siam bakah midfield laili thunun kawngah Baleba hian phili miah lovin theihna sang a pholang a, Brighton & Hove Albion aṭanga an lakluh nana United sum sen tam tak chu a phu zia a rawn lantir nghal a ni.

Match zawha press conference-ah head coach Michael Carrick pawhin Baleba-a chet dan hi a fak hle a. Baleba pawhin United fan-te hnenah thuchah thawnin, an draw avanga a lungngaih rualin a mumang anga a lo suangtuah ṭhin United tana a inlan thei chu a lawm takzet tih a tarlang bawk.

Final whistle rik hnuah reporters te kawmin Lammens chuan Baleba leh bench aṭanga rawn lut dangte thawhhlawk zia chu a sawi a: "A pawimawh takzet a ni. Vawiina thil ṭha berte zinga mi chu, anmahni an rawn luh a, nasa taka min rawn puih kha a ni a - chu chu mitin maiin an hmu vek ang," a ti.

"A tawp lamah khan tha thar leh chet chakna kan mamawh a ni. An theihna an rawn pholang thei chu an tan pawh ka lawmpui hle a, mahse training-ah nitin kan hmuh ṭhin a nih avangin kan tan chuan thil thar a ni lo. Squad chhah tak kan nei tih kan hria a, chuvangin tun season-ah hian heng mite hian mawhphurhna an lak a ngai dawn a, vawiina an rawn ti thei hi ka lawm hle a ni," tiin Lammens chuan a sawi belh.

Half-time laia Carrick-a tactic thlak chungchang sawiin Belgian shot-stopper chuan, "First half-ah khan ball kan neih lai leh neih loh lai pawhin kan ṭhat zawk a ngai tih chu a lang chiang a. Tactic ṭha tak nen min rawn nawr (press) a, chhuahsan a harsa hle. Chuvangin half-time-ah khan tactic thlakin, player ṭhenkhat rawn lut ten min pui bawk a ni.

"Chumi hnu chuan inkhel kha mahni lamah kan pawt tluang a, inkhel kan thunun nia inhriatna a awm nghal. Chuvangin a lehpekah chuan khatiang khan bul ṭan nghal a, a bik takin helai hmun (Old Trafford)-ah ngei hian khingpuite nawr chunga inkhel thunun nghal theih kan tum a ngai a ni," a ti bawk.

United match hmachhawn tur khirh tak tak lo thleng tur chungchangah Lammens chuan: "Thil hi kawng hnihin a thlir theih a ni. Match a inlar zut zut dawn tih kan hria. Beidawnna kan tawk a nih pawhin, chu rilru chu i keng reng thei a, a nih loh leh rang takin i inthlak a, match a lo thleng leh thuai dawn tih i hre thei bawk. Keima mimal tak phei chuan game ṭha ber ka khel lo a nih chuan, rilru nawm lohna paih bo nan match dawtleh hi ka nghakhlel ṭhin.

"Chuvangin chutiang rilru chu kan put a ngai a ni. Vawiinah thil ṭha tam tak kan ti tih kan hria a, thil ṭhate chu la in a ṭha lo aṭangin kan inzir tur a ni. Match pawimawh tak tak a lo thleng dawn a, chutiang khelh chu nuam kan ti bawk. Season liam ta khan Champions League khel turin kan bei nasa a, he inelnaa kan awm thei hi kan lawm hle. A thui thei ang ber thlen kan duh a nih chuan heng match-te hi kan chak a ngai bawk," tiin a sawifiah.

United hian Thawhlehni zan hian Champions League inkhelah khualmualah Atletico Madrid an hmachhawn chhunzawm nghal dawn a ni.