Inrinni khan Old Trafford-ah Manchester United chuan Tottenham Hotspur chu 1-1 in an inhnehtawkpui a, 2026-27 Premier League season-a an bulṭan chhiat zualzelna pholangin record duhawm lo tak an siam belh leh ta a ni.
He inkhelah hian minute 73-naah Bryan Mbeumo chuan mualneitu United tan goal hmahruai a khung a, hei hi tun season top-flight inelnaa a goal thumna a ni. Hemi hnu lawkah Tottenham midfielder Rodrigo Bentancur chuan Luke Shaw-a chal chu a tauhsak avangin direct red card hmuin hnawhchhuah a ni a, United tan chak theihna dinhmun ṭha a inhawng zual tura ngaih a ni hman.
Mahse, player pakhat maia an tam zawkna chu Carrick-a naute hian an chhawr ṭangkai zo lo a, stoppage time-ah Dominic Solanke chuan Spurs tan siphurh a rawn rul ta hlauh mai a, dinhmun ṭha lo ve ve a ding team pahnih hian point khat ve ve insem bawkin an inkhel an titawp ta a ni.
He result vang hian United chuan tun season league match ruk (6) an khelh tawhah point 6 chiah an la hmu a. Statistics aṭanga chhutin, hei hi kum 40 chhunga club-in season bul an ṭan chhiat ber a tling hial a ni. Kum 1986-87 season khan Sir Alex Ferguson-a hnuaiah game 6 aṭangin point 4 chauh an lo hlawhchhuak tawh a, Ferguson hian a hnu lamah Premier League nomawi 13 ngawt chawiin football chanchina manager ropui ber nihna a chelh zui a nih kha.
Inkhelh zawha chanchinbumite a kawmnaah, Carrick chuan United chu hun khirh tak karah an awm mek tih a pawm a, an dinhmun siamṭha thuai turin a player-te hnenah thil phut pathum a neih thu a sawi bawk a ni.
Mahse, United tan hian thil a awlsam dawn lo khawp mai; an match hmachhawn turte chu a hautak chho hle dawn a ni. Thawhlehni hian Champions League inkhelah Atletico Madrid tlawhin khualmualah an zin hmasa phawt ang a, hemi hnu hian Elland Road-ah an hmelma hlun Leeds United an hmachhawn leh ang a, Europe-ah let lehin Cesc Fabregas-a enkawl Como chu khualmualah an pan leh dawn a ni.
Tottenham nena an inhnehtawkna nghawng a la reh loh lai hian, Carrick leh a naute hian hmingchhiatna thar an nei tih a lang chhuak zui bawk. Statistician lar OptaJoe-in a tarlan danin, "Fulham leh Tottenham Hotspur te 1-1 a an inhnehtawkpui zawnnaah khan, Manchester United hi table mawngphah luahtu club-te laka league match a zawna khel a, a khawi mah hneh zo lo team hmasaber an ni a, December 2017-a West Brom hnua hetiang dinhmun tawng leh hmasaber an ni," tiin an tarlang.
United hian tun dinhmunah eng thil mah an ti fuh hleithei meuh lo a, beiseina a tlawlh zel a ni ber mai. Michael Carrick hian club hotute thlawpna a la nei zui zel nia hriat a ni chungin, an khelh dan leh result hi a ṭhat chhoh vat loh chuan thil hi a inthlak danglam chak thei dawn hle a ni.
