Manchester United striker hlui, tun nipuia Brighton aṭanga Chelsea zawmtu Danny Welbeck chuan a football career chhunga a khelhpui tawh zinga player ṭha ber chu Wayne Rooney a nih thu a puangzar ta.

JoelBeyaTV YouTube channel-in kawmna an neihpuinaah, kum 35 mi Welbeck hian a khelhpui tawh zinga ṭha ber an zawhna chu tlang takin, "Ka tan chuan, Wazza, Wayne Rooney a ni," tiin a chhang a ni.

United academy chhuak Welbeck hi rawlthar a nih laiin Sir Alex Ferguson-a hnuaiah Old Trafford-ah first-team a rawn rap ṭan a, khatih lai khan Rooney nen hian mual an inṭawm ṭhin a ni. Ferguson-a enkawlna hnuaia kum 2013-a Manchester United-in an Premier League title hnuhnung ber an lak ṭum pawh khan Welbeck hi team-a mi pawimawh tak a ni hman bawk.

A vanglai hun chu hliam hrang hrangin tibuai fo mah se, season liam ta 2025-26 khan Welbeck hi a rawn che ṭha thar leh em em a, Brighton tan inelna hrang hrangah match 40 khelin goal 14 lai a khung a ni. He a chet ṭhatna avang hian kumin nipui bazar chhung khan Xabi Alonso-a enkawl Chelsea chuan an lalut ta a, Stamford Bridge-ah pawh bul a ṭan ṭha nghal hle. Chelsea tana a match hmasa sarihah goal thum a khung der tawh a ni.

Chelsea-in an lakluh hma hian, tlarhma thuamchakna tur striker zawng mektu Manchester United pawh khan an academy player hlui Welbeck hi lakluh leh tumin an lo sawizawm ve hman tawh bawk a ni.

Welbeck-a'n Brighton-a a theihna sang a pholang leh kha Rooney chuan a lo chhuang em em a, Old Trafford-a la kir leh turin United hotute nawrtu lian berte zinga mi a lo ni tawh a ni. Kum 2025 khan BBC Sport-a 'The Wayne Rooney Show'-ah he United all-time leading scorer hian, "Kum hnih liam ta chhung khan amah hi United-ah kir leh thei se ka ti takzet a ni. Tunah chuan United hian kawng dang an zawh chho mek a, hma an sawn chhoh zel ka beisei. Mahse kum liam ta chhung zawng khan kir leh se ka duh ṭhin a ni. Brighton-ah a tlangnel hle a, goal khung chhunzawm zelin England squad-a koh luh leh a nih theih nan hun ṭha a insiam zel ka beisei," tiin a lo sawi chhuak tawh a ni.

Brighton-a a chet ṭhat em avang khan Thomas Tuchel-a enkawl England national team-a koh kir a nih theih nan leh 2026 World Cup squad-a a tel ve theih nan Rooney hian a lo thlawp hle bawk a, mahse Tuchel-a'n Three Lions squad-ah a ko ta lo thung a ni.