Manchester United manager Michael Carrick chuan Nilaini hian Como an hmachhawn dawn a, he inkhelah hian chak ngei tumin theih tawp a chhuah a ngai tawh dawn a ni. Carrick-a naute hian tun season chhungin khualmualah vawikhat mah hnehna an la chang lo a, inelna hrang hrangah thla khat chuang zet hnehna la chang miah lovin an awm mek bawk a ni.

An match hnuhnung berah Leeds United chu an khelmualah va tlawhin, league match pasarih an khelh tawh aṭanga an vawi li inhnehtawpna chiah a ni a. Europe inelna lamah pawh vawikhat chakin vawikhat an tlawm tawh bawk. Tlawm an neih ṭum phei hi chuan match zawha Lisandro Martinez-a'n inbiakna a neihnaa a thusawi avangin boruak a rit zual hle a nih kha.

Carrick-a dinhmun a derthawn tak chhoh em avang hian club hotuten manager thar an zawng dawn em tih sawi a tam chho hle a. England captain hlui Alan Shearer chuan Carrick hi banna pek a nih thut chuan Brighton manager Fabian Hurzeler chu United manager ni tura a duh ber a nih thu a sawi chhuak a ni. Kum 56 mi Shearer hian Hurzeler hian hetiang khawpa boruak rit leh ngaihven hlawh club lian a la enkawl ngai lo tih pawm mah se, he chona hi a hmachhawn thei ngei ang tih a rin tlat thu a sawi a ni.

Betfair hnenah Shearer chuan, "Carrick hi a hna aṭanga chawlhtir a nih chuan, Hurzeler hi thlaktu ṭha tak a ni ang, mahse Brighton-a an kalphung leh United kalphung erawh a inang lo hle thung. Manager dang en theih tur chu Eddie Howe a ni bawk ang," tiin a sawi. A sawi zawmnaah, "Antonio Conte pawh thlir theih zinga mi a ni ang. Mahse duh emaw duh lo emaw, football match-ah i chak loh reng a, khawvela club lian bera i awm bawk si chuan hetiang thil hi a thleng ngei ngei ṭhin a ni. Hei hi chu pawm thiam a ngai a, Carrick pawh hian a hrethiam ngei bawk ang," a ti.

Kar tawp inkhelh hmain Shearer hian heng thu hi a lo sawi a, chumi hnuah United chuan Leeds an inhnehtawkpui laiin, Hurzeler-a enkawl Brighton erawh chuan Crystal Palace chu 5-0 ngawtin an sawp thung. Kum 2024-a Hurzeler-a'n Brighton a enkawl ṭan aṭang khan Seagulls hian United nena an inhmachhawn vawi rukah vawi li ngawt hnehna an chang tawh a, Carabao Cup-ah phei chuan 2-0 a an hnufual hnuah 3-2 a lehthalin United hi an lo hneh tawh a ni.

Hetianga Carrick-a chungchanga boruak a len lai hian, United manager hlui Erik ten Hag pawh a ṭawngchhuak ve bawk a. 2024-25 season laihawl laia Old Trafford chhuahsantu Ten Hag hian The Athletic hnenah inbiakna neiin, United a enkawl laia player lian tham a lak theih loh chungchangte a phawrhchhuak a ni. Dutch coach hian England striker Harry Kane leh midfielder Declan Rice te chu a lak luh tum ber zinga mi an nih thu sawiin, an ram mi Frenkie de Jong leh striker Brian Brobbey te pawh lak a tum zinga an tel thu a tarlang.

Kane umzui an tum dan chungchang sawiin Ten Hag chuan, "Club hotute (United board) hnenah khan, 'Player pakhat chiah ka duh a—tunge a nih pawh in hria e,' tiin ka hrilh a. A theih nan ka bei nasa hle. Ani pawhin min zawm a phur hle tih ka hria a, mahse he thil chungchangah hian amah tlang takin ka be miah lo thung. John Murtough, Richard Arnold leh Glazer chhungkua te inkarah khan thutlukna engtin nge an siam fel tih ka hre lova, sum leh pai lam dinhmun pawh engmah ka hriatpui lo," tiin a sawi.

Kane hian Bayern Munich a pan ta a, Rice chuan khatih laia Premier League record manin Arsenal a zawm ta thung a nih kha. Ten Hag chuan Rice chungchang sawi zui lehin, "Harsatna awm chu West Ham khan chhuahtir an duh lo kha a ni. Kan bawhzui na tawk lo deuh em ni aw ka ti rum rum ṭhin. Rilru inhmun takin hma lak kan tum a, hotute pawhin an bei ngei a, mahse indawrna kha engtin chiah nge a kal zui tih ka hre lo. Sawi duh ber chu, United-ah chuan player danglam bik leh ṭha chungchuang i mamawh tlat a ni," a ti.