Manchester United legend Paul Scholes-a theihna leh a hmingṭhatna chu sawi buai ngai miah lo a ni a, United-in Premier League title 13 an lak zinga 11 ngawt a la hman a ni. Red Devils tan hian kum 51 mi Scholes hian match 717 zet khelin goal 155 a khung a, midang pet luh tur vawi 84 a siamsak (assist) hman bawk.
Sir Alex Ferguson-a enkawlna hnuaiah Scholes hi United laili thunun theitu ber a ni a, Old Trafford-a hun hnih chhung a hman chhung khan midfield lailiah nghawng pawimawh tak a nei reng ṭhin. Club chanchina hmingthang 'Class of '92' star zinga mi a nih ang bawkin, Scholes hi Premier League leh khawvel chanchina midfielder ṭha berte zinga chhiar tel ziah a ni bawk.
Chutiang chu ni mah se, German World Cup winner Toni Kroos chuan khawvel chanchina midfielder ṭha ber pathum a thlannaah he England international hlui hi hlamchhiahing, Real Madrid-a a thawhpui ṭhin Casemiro a thlang ta zawk tlat a ni.
Kumin nipuia Old Trafford chhuahsantu Casemiro hian Real Madrid-ah khan Kroos leh Luka Modric te nen khawvel barakhaih khawpa midfield inkawp fuh leh nghet an siam a. Kum 34 mi Brazil midfielder hi Modric leh Kroos te nen an inkawpna laili ber niin, Los Blancos tan khan nomawi lian tham tam tak an chawi khawm a nih kha. Casemiro hian Spanish club lian tan hian La Liga title 3, Copa del Rey 1 leh Champions League nomawi vawi 5 ngawt a chawi hnuah United panin a kalsan ta a ni.
'Einfach mal Luppen' podcast-a a inlan tumin, Kroos chuan Casemiro chu khawvel chanchina midfielder ṭha ber a thlannaah pathumna a nih thu a sawi chhuak a:
"Ka number three chu Casemiro a ni a, [Patrick] Vieira pawh a tel lo thelh a ni," tiin a sawi.
Kroos chuan sawi zawmin, "A thil lo hlawhtlin tawhte, a nihna leh team tana a pawimawhna - pawn lam aṭanga a nihna aia hmuhniam leh dah hniam an hrat ṭhin zawk te i thlir chuan - ani hi ngaihsan leh chawimawi a phu takzet a ni," a ti bawk.
Kum 2022 khan United chuan Casemiro hi £70m vel sêngin an la a, Champions League nomawi vawi nga la tawhtu hian manager Erik ten Hag-a hnuaia a season hmasaberah khan United midfield thuamchakin theihna ropui tak a pholang nghal a ni. Kroos chuan Chelsea leh France midfielder hlui N'Golo Kante ai pawha Casemiro a dah san zawk chhan a sawifiah zui bawk.
"Hei tak hi Kante ka dah san em em theih loh chhan a ni," tiin Kroos chuan a sawi belh a. "Madrid-a ka hun hman chhung khan, Luka leh keini hian Casemiro-a hmasawn dan leh kum tin mai a khelh ṭhat chhoh tual tual dan kha kan mit ngeiin kan hmu a ni.
"Keini pahnih tana a thil min pek kha chu hai rual a ni lo a, mahse heng kum chhung zawnga a theihna (technique) a tihhmasawn zia hmuh kha a ropui em em bawk. Chuvang tak chuan, ka ngaihdanah chuan khawvela top five zingah a tel ngei tur a ni a, tun dinhmunah phei chuan pathumnaah a awm a ni," tiin a sawi.
Casemiro hian United tan match 160 a khelh hnuah season li a hmang liam a, goal 26 khungin assist vawi 14 a nei a, League Cup leh FA Cup nomawi a chawipui hman a ni. He Madrid star hlui hian kumin nipui khan Major League Soccer club Inter Miami chu a thlawnin (free transfer) a zawm ta a ni.
