Champions League inkhel pawimawhah Manchester United chuan Italy ramah Como an pan dawn a, he inkhelah hian team pahnih aṭangin player 19 ngawt an inlan thei dawn lo. Michael Carrick-a naute hian an tumpui Como hi an hneh ngei a ngai tawh a, mahse United squad aṭang ringawt pawhin player pakua (9) lai an chhawr thei dawn lo a ni.
Kar tawp khan United hian Leeds United chu 1-1 in an inhnehtawkpui a, hei hian inelna hrang hrang match ruk chhung chak nei lova an awmna a chhunzawmtir a ni (vawi thum tlawmin vawi thum an inhnehtawk). Caretaker manager a nih laia a chet ṭhat em avanga permanent head coach nihna hmu zui ta Carrick hian khelmuala hnehna zawng chhuak turin pressure sang tak a hmachhawn mek a ni.
Mahse, Carrick hian player indaih lo tak chungin he khualmual match hi a hmachhawn a ngai dawn thung. Elland Road-a an inlan loh hnuah Luke Shaw leh Kobbie Mainoo te chu damdawi in lam pan an ngai a, tlarhnung vengtu Shaw phei chu hun rei zawk a chawlh a ngaih hmel a, Mainoo pawh November international break hma chu a inlan thei dawn lo a ni.
Lisandro Martinez pawh Leeds laka half-time-a lakchhuah a nih hnuah he match-ah hian a inlan thei dawn lo a, kar tawpa Bournemouth an tum hunah erawh a kir leh theih an beisei thung. Marcus Rashford pawh North America-a World Cup an khelh laia a khel hliam (hip injury) a neih avangin chawlh lailawk tir a la ni zel a. Manuel Ugarte, Patrick Dorgu leh striker Benjamin Sesko te chu hun rei tak chawl tur an nih bakah, rawlthar Ayden Heaven pawh a damlohnain a la tlakbuak reng avangin a zawnin match hnih a hmaih dawn ta a ni.
Squad dinhmun chungchangah Carrick chuan, "Thil a inpawlh nawk mai a nih hi, player inlan thei lo kan ngah hle. Licha (Martinez) hliam hi a na lutuk lo na a, mahse kan rualin a rawn kal ve lo a, kar tawpah a inpeih dawn em tih kan en ang. Kobbie erawh chu ni 10 vel chawlh a ngai mai thei a, Luke phei chu a aia rei a ngai ang. Kan camp chhungah hian hliam leh damlohna a thleng kual nual bawk a. Ayden a damlo a, Marcus pawhin a khel lamah buaina tlem a la nei a, hengte hi a ziaawm thuai kan beisei a ni," tiin a sawi.
Khingpui tur Como lam pawh an dinhmun a ṭha bik chuang lo a, Cesc Fabregas-a enkawl team hian United hmachhawn tur hian player 15 chauh an nei a ni. Italian club hian Champions League-ah United ang thovin record an nei a, RB Leipzig 4-1 a an hneh hnuah Feyenoord lakah an tlawm ve leh bawk a ni.
Como tan Trevoh Chalobah, Moise Kean leh Assane Diano te chu hliam vangin an inlan thei dawn lo. Chelsea leh Arsenal midfielder hlui Fabregas-a'n kumin nipuia a lakluh Kean leh Chalobah te tel loh bakah, an club ṭhanlen chak lutukna chuan harsatna a thlen tel a ni. Serie D aṭanga Serie A thlenga rang taka an kaisan avangin, academy puitling an la nei tawk lo a, UEFA dan ang thlapa ram chhung leh club-a zirtir chhuah (club-trained & association-trained) player an neih tlem avangin squad 25 ziah luh theihah mi 23 chauh an thehlut thei a ni.
Hemi chungchangah Fabregas chuan, "Thil reng reng hi buk tawn a ngai ṭhin a. Khelmual chhungah rang takin kan thang lian a, mahse khelmual pawn lamah chuan tihhmasawn leh sawiho ngai thil tam tak a la awm a ni. Entirnan kan academy te hi, Champions League-ah UEFA list vanga hrem ang hial kan nih phah a. Naktukah hian player 15 chauh kan chhawr a ngai mai thei a ni. Champions League zan ropuia khelh theihna khawp theihna nei player min chhawpchhuaksak thei academy kan la neih loh vang a ni," tiin an harsatna a sawichhuak bawk a ni.
