Nilaithawhṭannia League Cup-a Brighton an hmachhawn turah, Manchester United-in an player thar Andrey Santos chu a vawikhatna atan bul a ṭantir maithei a. Head coach Michael Carrick-a'n an player Carlos Baleba a chhawr thei dawn lo bawk nen, squad-ah siksawi hna a thawk nual maithei a ni.
Hliam aṭanga rawn kir hlim Luke Shaw-a chu chhawr rim lutuk loh an duh avangin tlar hnungah hman nghal a rinawm loh a, chutiang bawkin Diogo Dalot-a leh Harry Maguire-a te pawh chawlh hahdam tir an nih hmel. Pathiannia Manchester City laka Patrick Dorgu-a chet chhiat hnuah, Carrick-a tan left-back thlang tur hian thutlukna siam a harsa hle dawn a ni. Shaw-a fitness dinhmun thlirin, khelmuala luhtir nghal ngawt aiin venhim rih chu a ṭha zawk a. Match khelh tur a tawt chhoh dawn avangin Maguire-a leh Dalot-a te pawh chawlh hahdam tir hi thil awm tak a ni.
Baleba hian khelmualah mimal training a nei ṭan tawh a, mahse kar thum chhung chawlh (international break) a awm hma chu a inlan a rinawm loh. Amad-a pawh a la inlan theih loh avangin mual dinglamah Carrick-a tan player thlan tur a tlem hle. Kobbie Mainoo-a pawh a khel hnem tawh avangin chawlh pek a nih hmel a, City laka lakchhuah tak Youri Tielemans-a erawh a hahdam zawk avangin Nilaithawhṭanni hian a inlan ngei a rinawm.
Tlar hnung siksawi turah hian goalkeeper Senne Lammens-a chu tlar hnung thar hmaah a inlan a rinawm a. Noussair Mazraoui-a'n right-back hmun a luah ang a, Leny Yoro-a leh Ayden Heaven-a te chuan tlar hnung laili (central defence) rawlthar inkawp an siam bawk ang. Lisandro Martinez-a chu left-back lamah a sawn phei maithei a ni. Martinez-a veilama chhawr hian Dorgu-a hmunruak a hnawhkhat thei ang a, Shaw-a lakah pawh phurrit a siam lo bawk ang. Hei hian Heaven-a tan pawh Yoro-a bula bul ṭanna hunṭha a siamsak dawn a ni. Dalot-a emaw Mazraoui-a emaw veilama chhawr a, a zawk zawk dinglama chhawr pawh a theih tho a, mahse Dalot-a chawlh hahdam tir a nih dawn chuan Martinez-a veilama chhawr hi a rinawm ber a ni.
Santos-a'n Tielemans-a rualin tlar laili hnung hret (deeper midfield) ah a vawikhatna atan bul a ṭan a rinawm a. Hei hi Brazil rawlthar fiahna hunṭha a nih rualin Mainoo-a tan chawlh hahdamna hunṭha a ni bawk ang. Bruno Fernandes-a'n number 10 hmun luahin, tlar laili thar hmaah tawnhriat leh thiamna a rawn thehchhuak ang. Mason Mount-a pawhin minute tlem a hmuh ve ngei beisei a ni a, a theihna hrang hrangte hmangin Carrick-a'n inkhelh chhungin tlar laili a siksawi thei dawn a ni.
Amad-a a inlan theih loh avangin Bryan Mbeumo-a chu dinglamah a inlan leh ngei a rinawm a. Shea Lacey-a pawh hman theih a nih laiin, Carrick-a'n he inelnaah hian player siksawi kual chiam a tum hmel loh. Benjamin Sesko-a chu centre-forward-ah a rawn inlan ang a, Matheus Cunha-a laka Carrick-a'n rinna a nghat tlat chungin, veilam sirah chuan Marcus Rashford-a chu thlan zawk a nih a rinawm hle. He tlarhma pathum hian tlan chakna, taksa chakna leh tawnhriat an rawn kawp dawn a, Fernandes-a'n Sesko-a hnung aṭangin a rawn thlawp bawk ang. Left-back hmun hi thutlukna harsa ber tur a ni a, Dorgu-a'n City lakah harsatna a tawk a, Shaw-a hman a chi rih loh bakah Dalot-a chawlh a ngai bawk nen, Martinez-a sawn phei hi kawng awmchhun a ni maithei. Chu thutlukna chuan Heaven-a tan pawh centre-back-a inlan theihna hunṭha a siamsak dawn a ni.
