Tun season kal meka Manchester United tlarhma lamin goal khung kawnga harsatna lian tak an tawh mek avangin, head coach Michael Carrick chuan tun season-a Bundesliga tualchawla che ṭha tak striker Igor Matanovic lalut turin club neitu INEOS chu a nawr mek nia tarlan a ni.

Tun season chhung hian Manchester United tlarhnung (defence) lamin sawiselna nasa tak an tawk tawh a, mahse tlarhnung mai ni lovin an tlarhma (attack) lam pawhin mamawh hun takah theihna an phochhuak thei bik lo a ni. Red Devils hian Premier League match hmasa berah kaisang thar Hull City an hmachhawn ṭumin goal an khung thei miah lo a. Chu mai bakah, derby match boruak lian leh inhnialna tam tak awmnaah, player sawm chauhva khel Manchester City lakah pawh goal khung zo lovin an tlawm zui bawk a ni.

Carrick-a'n tlarhma lailia Matheus Cunha chu 'false nine' anga a chhawr zui zelna chuan beisei a phak lo hle a, team tan a thawk ṭha tawk lo a ni. Head coach Carrick hian hliam na tak vanga hun rei tak chhung khelmual chhuahsantu Slovenian striker Benjamin Sesko chu fimkhur takin khelmualah a chhawr chho mek bawk a. Sesko hian goal hnih chu khung tawh mah se, amah chauh chuan a tawk lova, tlarhmaah puitu ṭha a mamawh takzet a ni. Chutih rualin squad-a awm striker dang Joshua Zirkzee lah chu goal khung hnem mi leh goal thun theih lama hmingthang a nih loh vang a ni.

Heng zawng zawng avang hian, goal khung theih loh vanga an buaina chinfel nan leh tlarhma thuam chak nan Carrick hian Bundesliga mual chawmtu Matanovic hi Old Trafford-a lakluh ngei a duh a, he thilah hian club neitu INEOS lamin rang taka hma an lak theih nan a nawr zui mek a ni.