Manchester derby-a Manchester City striker Erling Haaland-a'n minute 60-naa chakna goal a khung chungchangah tihsual an neih thu referee thuneitu sang Pro Ref chuan an nemnghet a. Referee Michael Oliver chu khelmual sir monitor-a enfiah tura VAR-in a hrilh loh chu tihsual lian tak a nih thu an pawm ta a ni.
Old Trafford-ah hian City chu darkar khat chuang zet mi 10-in khel mah se, Haaland-a goal khung hmang hian 1-0 in hnehna an chang a nih kha. Mahni muala an chak lohna goal chungchangah hian khelmualah ngei enfiah ṭha leh tur a nih thu Manchester United hian thuchhuah nemnghet an dawng ta a, season ṭan tirh vela point inchuh mekah nghawng lian tak a neih phah ta a ni.
Haaland-a goal khung dan hi Josko Gvardiol-a cross chu United defender Patrick Dorgu-a boot-ah a per a, Enzo Fernández leh Lisandro Martínez te pel pheiin City striker hian goal-ah a lo khung a ni. Khelmuala referee thutlukna hmasaah chuan Haaland hi offside anga ngaih a ni a, mahse VAR chuan enfiahin Haaland hi onside-ah a ngaih avangin goal hi a pawm ta zawk a ni.
Pro Ref thuchhuah tarlan danin, Fernández hian ball a khawih fuh chiah loh avangin, offside a nih leh nih loh chu referee-te ngaihdan leh chhut dan (interpretation) a zirin a innghat ta a. Amaherawhchu, Fernández-a dinhmun khan Martínez-a tlarhnung venhim theihna a tibuai em tih chu VAR lam hian ngunthluk takin an bihchiang lo a, Oliver-a chu pitchside monitor-ah amah ngeiin a va enfiah theih nana hrilh tur an nih thu an pawm a ni. Pro Ref hian he tihsual chungchangah hian Manchester United an be tawh a, hemi hnuah thil thleng enfiahna puitling kalpui a ni ang tih an nemnghet bawk.
Manchester derby vawi 199-naah hian City tan minute 23-na lekah Phil Foden chu United captain Bruno Fernandes-a pum lama a pet avangin red card pek a ni a. Hemi hma hian United captain hian a lo pet hmasa ve bawk a ni. City boss Enzo Maresca chuan a forward hnawhchhuah a nih danah Oliver-a thutlukna chu pawmpui mah se, thil thlen dan chhan erawh Fernandes-a chet hmasak vang a nih thu a sawi ve thung.
Match zawhah United head coach Michael Carrick chu a lungawi lo hle a; goal aṭanga yard 6 chauhva hlaah ball chang tura a inbarh luh meuh pawha Fernández chu inkhel tibuaitu (interfering with play) anga an ngai lo chu mak a tih thu a sawichhuak a ni. Sky Sports tarlan danin defender Lisandro Martínez pawhin season tin dan leh hrai an zirtir ṭhin chung pawha hetiang tihsual lian an nei chu "pawm theih a ni lo" tiin a sawisel bawk.
He Manchester derby inkhelh hma hian Old Trafford chhungah ticket hralh chhawn chungchanga United thutlukna dodalna a chhuak a, player tlan luhna tunnel chungah club thutlukna sawiselna banner an tar a, Stretford End-a banner pangngaite pawh hmuh tur a awm lo. United chuan Zirtawpni khan account 685 an hrem thu leh supporter 464 hnenah hremna zangkhai zawk leh warning an pek thu an lo puang tawh a nih kha.
The Athletic-in VAR kalpui dan a zirchiannaah chuan semi-automated offside technology hmangin Haaland chu onside ngei a ni tih fiah ni mah se, Fernández-a chet danin Martínez a tihbuai dan erawh referee-te hian uluk takin an enfiah lo tih a tarlang a, hei ngei hi Pro Ref pawhin an tihsual a nih thu an pawm tak chu a ni.
