Manchester United chanchin tharah hliam vanga chawl player-te dinhmun leh Etihad Stadium lama thil thlengin Old Trafford-a nghawng a neih theih dante chu thupui ber a ni chho mek a ni.
United player lak thar Carlos Baleba chuan an tana a match hmasaber khel turin a nghah rih a ngai dawn a, amaherawhchu kar kalta Inrinni khan hnungzang hliam vanga thla 10 chhung zet chawl tawh centre-back Matthijs de Ligt chu squad-ah hruai tel a ni ve thung. Kum 27 mi defender hian London panin team bus a zawm ve na a, Pathiannia Craven Cottage-a inkhel turin coach Michael Carrick-a matchday squad-ah erawh a tel lo a ni. Hei hian mi tam tak ngaihven hlawh mah se, a tir aṭanga an ruahmannaah chuan zin pui ve mai tura tih a nih thu hriat a ni. De Ligt hian tun kar chhung khan first-team training a zawm leh tawh a, Champions League-a Atletico Madrid emaw Como an hmachhawn hunah bench-ah a rawn inlan thuai beisei a ni.
Midfielder Baleba pawh Pathianni lo awm tura Tottenham an hmachhawn hunah bul ṭan thei dinhmunah a ding mek a. Kum 22 mi Cameroon international hi kar kalta khan a teammate dangte chawlh an hman laiin Carrington-ah a inbuatsaih a, tun kar chhung pawhin first-team training-ah a tel ṭha hle. May thla hnuah competitive match la khel lo mah se, training a beih nasat dan aṭangin Carrick-a'n bul a ṭantir mai theih a beiseiawm a ni. Ineos ta Lausanne-Sport nena inkhelh mual khar (behind closed doors) a friendly match an khelh ṭum khan minute engemaw zat a khel hman bawk.
He friendly match avang hian Lausanne-Sport tana season dang loan-a khel mek kum 20 mi Sekou Kone pawh Carrington-ah a rawn inlar leh a. Swiss Super League club tan hian game 9 khelhah vawi 6 bul ṭanin, vawi 3 bench aṭangin a lut a, a khel ṭha chho hle. Kumin nipuia an lak ngheh kum 21 mi centre-back Tyler Fredricson pawh kephah ruh (metatarsal) hliam enkawl zui turin Carrington-ah hian a rawn kir leh tawh bawk a ni.
Friendly match-a inlan ve lo zinga mi chu striker Benjamin Sesko a ni. Kum 23 mi Slovenian striker hian a khup ruh hnuai (shin) hliam a tawrh nawn fo avangin Slovenia camp a chhuahsan leh a ngai a, November 2025 hnua ram tana la khel lo he forward hi kar liam ta khan scan leh test hrang hrang neihpui niin enkawl dan tur ruahmanna an siam mek a ni. Nipui lai khan thla hnih chhung chawlh hahdamna pek a lo ni tawh na a, a natna ngaiah hian harsatna a tawk leh a ni. Carrick hian Tottenham match hmaa press conference-ah a chanchin hi a sawifiah a ngai dawn a ni.
Manchester khawpuiah chuan Premier League-in Manchester City an hekna chungchanga thutlukna rapthlak tak chhuak chu football khawvela sawi hlawh ber a ni mek a. Hei hian United tan sum lama zangnadawmna hmuh theihna bakah 2011/12 leh 2017/18 season-a title hlan theihna dinhmun a thlen theih rualin, Old Trafford club erawh an la ngawi rih tlat a ni.
United CEO thar Omar Berrada pawh City hnuaia hetiang thil a thlen lai khan international business development hotu, partnership sales director leh chief operating officer lo ni tawh a ni a. Eng thil dik lo mah a ti tih sawina awm lo mah se, he thutlukna hian zawhna a siam theih avangin United tan boruak a ti-awkward deuh thei a ni. Berrada hi he thubuaiah hian hek a ni lo a, finfiahna pe tura koh pawh a ni lo.
Thawhlehni hian kum 16 tling tur rawlthar JJ Gabriel-a hmabak pawh a chiang chho thuai dawn a. EU passport hmangin European club dang a pan theih dawn bakah FIFA pawmpuina a ngen thei dawn a ni. United lam chuan compensation sum £200,000 aṭanga £300,000 inkar vel an hmuh theih nan he rawlthar hnenah hian scholarship contract an zawrh dawn a ni.
