Aston Villa mual Villa Park-a match khel tura zin chhuah hmain Manchester United Women boss Eva Olid chuan chanchinbumite a kawm.

Kar kalta inrinni khan United hian Everton nen 0-0 in an inhnehtawk a, an hma lakna (momentum) a muan deuh avangin manager Olid-i chuan kha match kha "office-a ni ṭha lo tak" tiin a chhal a ni.

A nihna tak sawifiahin Olid-i chuan, "A chang chuan ni ṭha lo tak i hmang ṭhin a, mahse i khelh ṭhat loh chang pawhin chak dan i zawn tlat a ngai a ni. Set piece aṭanga goal i chhuah emaw, goal thlen thlentu tihsual i neih ṭum pawhin chakna zawn tho a ngai. Kha kha ni ṭha lo pakhat mai a ni tur a ni a, ka player-te aṭangin chhanletna (reaction) ṭha tak ka beisei a ni," tiin a sawi. Match zawhah an khelh dan thlirin a player-te tana thuchah ṭha ber tur a ngaihtuah ṭhin thu sawi mah se, thil liam tawha hun khawhral rei lutuk a ṭangkai lo tih a tarlang bawk.

Squad chhunga beidatna tawk player-te thunun dan chungchang zawhna chhangin Olid-i chuan, "Player 25 awmna squad-ah chuan mizia hrang hrang an awm a. Player ṭhenkhat chu an inbengdai zui mai a, ṭhenkhat erawh an rilru a hah in an lungawi lo ṭhin. Mitin mai hian mizia inang lo leh beidatna hmachhawn dan hrang ṭheuh an nei a ni. Mipui zawng zawngin an rilru vei zawng an puanchhuah theih nan kawng kan hawnsak a, emotion leh rilru vei zawng hi tih tawp ngawt theih a ni lo," a ti.

League-ah United hian goal 9 chauh la khung mah se, cup competition-ah erawh goal 23 ngawt an khung tawh thung. Inbuatsaihna chungchang sawiin, "Cup match leh league match tana inbuatsaihna a inang reng a ni. Attack leh venhimna lamah kan thawk a, final third-ah thil tihpuitlin dan leh combination, goal khung theih nana chet vel dan te kan zir reng ṭhin," a ti bawk.

Schedule tight tak karah chona a hmachhawn mek tarlang chhunzawmin Olid-i chuan, "Mi thar ka nih vangin ka tan chuan hei hi chona lian tak a ni. Pre-season lai laili-ah rawn thlengin league inṭan hmain tactics zawh nan chawlhkar thum chauh ka nei a. September laili aṭang khan training session pumhlum ka la nei ngai lo. Thil tam tak tih belh duh mah la, identity leh game model tak tak siam nan hun a awm lo ṭhin. Tun kar erawh hma kan lakna tur idea siam nan session vawi li ngawt kan nei thei a, a ṭha hle a ni," tiin a sawi.

Match hma chhawng tur chungchanga point bituk (target) a siam ngai loh thu sawiin, "Game-by-game basis-a ngaihtuah hi ka kalpui dan a ni a, chutilah chuan point pathum hmuh char char a ni mai. Tute nge i hmachhawn a, an awmna a sang zawk nge a hniam zawk tih hi a pawimawh lo," tiin Olid-i chuan a sawi a. Team hmasawnnaah a lungawi rualin final third-ah goal khungna hun ṭha siam tam a, goal khung tam lehzual an mamawh thu a sawi tel bawk.

Player hliam dinhmun tarlangin, Scarlett Hill chu cup match-a a hliam avangin a inlan thei dawn lo tih a sawi a, Jess Anderson pawh a khup hliam avangin tun kar training-ah a tel thei lo bawk. Player ṭhenkhat pawh khawsik leh hritang avangin training-ah an buai nual thu a tarlang bawk.

Pathiannia an hmachhawn tur Aston Villa Women chungchang Olid-i chuan sawichhuakin, "Tactically taka an thil tih fiah tak mai hi mak ka ti hle a ni. An chakna hmang ṭhain opponents an pawt pharh a, hmun awlah hlauhawmna nasa tak an siam bawk. Practical takin an khel a, team angin an che ṭha hle avangin match harsa leh inelna khawh tak a nih ka beisei," tiin a sawi.