Kar tawpa Aston Villa an hmachhawn hmain, Manchester United head coach Michael Carrick chuan pangngai takin a hna a la thawk chhunzawm zel tih a sawi.
Tun kar tir lam Champions League inkhelah United hian Roma chu 3-2 a hnehin, match kaw (9) chhung zet an chak loh zawnna chu an titawp a nih kha. Result chhe tak tak an neih zawn char char avang khan club thuneitute rilru chu a buai hle a, Carrick-a dinhmun tur pawh ngaihtuahho a ni hial a ni.
Thla liam taa Bournemouth laka an tlawm chhiat em avang khan, club hotu Omar Berrada leh Jason Wilcox te chuan Carrick hi ban mai tur nge tih chungchang an lo sawidun tawh hial a. Old Trafford-a Villa an mikhual zawh hian November international break a inṭan dawn a, manager thlak tura thutlukna an siam a nih chuan he chawlh hi thutlukna kalpui nan hunṭha a ni thei dawn a ni.
Villa nena an inkhelh hmaa chanchinbumite a kawmnaah, international break zawhah pawh mawhphurhna a la chelh chhunzawm dawn em tih club lam aṭanga hrilh chian a ni tawh em tiin Carrick hi an zawt a. Ani chuan, "Aih, chutiang a awm lo. Engkim hi pangngai takin kan kalpui chhunzawm tawp mai a ni," tiin a chhang.
Ram tana koh ve loh player-te chungchang pawh sawiin Carrick chuan, "Kohna ṭhenkhat hi puan chian a la nih chiah loh avangin ka la hre chiang bik chiah lo a, senior player pathum emaw pali emaw vel chu an awm maithei a ni. Mahse, kar tharah chuan training kan nei ngei ang a, kar tawp lamah erawh kan chawl maithei a ni. Engtin nge thil a kal zel dawn a, tute nge cham dawn a, tute nge kan kianga awm a, enge an mamawh tih kan la thlir chho ang, mahse kar tharah training chu a awm ngei ang," tiin a sawi.
Carrick chuan sawi zawmin, "Ka ngaihdan chuan international break hi ram tana zin chhuak ve lo player-te leh coaching staff-te tan chuan tha thar lakna leh intharthawhna hun ṭha tak a ni ṭhin. Ram tana feh chhuak player ṭhenkhat pawhin boruak dang daihah thil thar an tawng a, chutiang thil chu a awm ve bawk. Keima tan erawh chawlh hahdam ka mamawh hran lo, hetiang hian ka ṭha tawk hle a ni," a ti.
Harsatna an tawh chhoh mekah amahah nghawng a neih loh thu sawiin, mahse hun harsa karah a player-te chuan an theihna tak tak an pholang tur a ni tih a sawi bawk. "Athlete ka ni tawh lo na a, mahse elna sanga inlan ṭhin kan nih angin famkim tlin ṭep tura beih reng hi kan tih tur a ni a. Famkim theih a ni ngai lo, mahse i theihna tawp thleng thehchhuaha beih hi i duh ber a ni ṭhin.
"Hetiang a nih avang hian i rilru puthmang, i inrintawkna leh i rilrua thil awmte hian hmun lian tak a luah a ni. Heng thilte paltlang theih hi a pawimawh ber a, thil chiang sa ni mah se kan ngaih pawimawh thlap a ngai a ni. Player-te dinhmun hriatthiampui chunga anmahni biak hi thil pawimawh tak a ni a. Chuvang tak chuan infiamna khawvelah boruak ṭha (momentum) neih hi a ropui em em a ni.
"Game chhunga boruak neih te, nitina boruak neih te, kar tin leh game tina boruak ṭha neih hi thil lian tham tak a ni. Khawi aṭanga lo kal nge tih hriatfiah chang harsa viau mah se, mahni rilru leh phurna nena kal kawppui thiam hi a pawimawh hle a ni. Chutiang chu player emaw team-te'n hun ṭha an tawn a, a changa an buai leh viau ṭhin chhan chu a ni bawk. Engkim a inrem khawm a ngai a, mahse rilru leh inrintawkna bakah ngaihtuah buai loh changte pawh a awm tur a ni. Thil i ngaihtuah kual vak loh a, i theihna ringa mahni rilrua awm anga i khelh mai hian i khel ṭha ber ṭhin a, zankhat inkhelah pawh khan chutiang chuan kan ti nasa hle niin ka hria," tiin a sawi zui bawk a ni.
