Manchester United rawlthar JJ Gabriel-a'n senior team-a a debut khelh hma lawka club chhuahsan a dil avangin a hmabak chungchangah sawi zui a tam hle a. Liverpool striker hlui Emile Heskey-a'n he rawlthar aiawhtute hian Manchester United chu dinhmun harsa takah an hnawn lut niin a ngai a, mahse he kum 15 mi hian club dang lian zawka khelh a chakna chu a hriatthiampui hle thung tih a sawi.
Heskey-a'n a fate ngei pawh Manchester City academy-a an lo seilen tawh avangin rawlthar rualte rilru put hmang leh an chhungte duhdan chu a hriat chian thu a sawi lang bawk. Gabriel-a'n Old Trafford chhuahsan a dil thut mai hian tun hnaiah sawi zui a hlawh hle a. He rawlthar hian tun dinhmunah chuan mimalin Barcelona-ah training a nei mek a, first-team-a khelh theihna tur club dang a zawng mek a ni. Spanish club lian pahnih Real Madrid leh Barcelona bakah German champion hlui Bayern Munich te nen sawizawm a ni bawk.
Heskey-a'n 10bet hnenah Gabriel-a'n inkhelh tam a duh zia a hriatthiampui rualin, United tan erawh thutlukna siam a harsat tur thu a sawi. "Nu leh pate thlirna aṭang chuan ka hrethiam hle a ni. He rawlthar theihna nei ṭha tak takte hi an hmanhmawh em em a, tlarhmaa khel sa tute nek chhuah tuma hun nghah hram hram hi an duh ṭhin lo. Mahse a nihna takah chuan, khelmuala hmun chang tur chuan mi dang i nek chhuah a ngai a—squad-a hmun i chan theih nan mi dang aiin i ṭhat zawk a ngai tlat a ni," tiin a sawi.
Heskey-a'n a hun hma lama a tawn hriat te sawi chhuakin, "Hun ṭha hi a rawn inhawng thut thei a ni. Keipawh ka hun hmasaber ka hmuh ṭum khan player dang a dam loh hlauh vang a ni a, chutih laia option awmchhun ka nih miau avangin hun ṭha ka hmu a, chu chu ṭha takin ka chhawr zui ta a ni. Player naupang tak, a bikin tun lai hunah phei chuan, kawngka inhawng leh khelh theihna tur kawng zawn vat vat hi an duh ṭhin hle," a ti.
"JJ Gabriel-a tan chuan first-team-a khelh a duh a, a theihnaah a inringtawk a, a inpeih tawh hle tih a inhriat chuan a duhthusam chu zahsak a ngai a ni. Mahse khawvela club lian berte zinga mi United-ah i awm a, tu nge i nek chhuah ang a, an aiin i ṭhat zawk em tih hi ngaihtuah tel a ngai bawk. Kum 15 mi lek tan Premier League club lianah first-team-a khelh reng mai hi thil theih loh tluk a ni a. Kar tina bul ṭan tur chuan tawn hriat nei ṭha senior player-te aia i chungnun zawk a ngai tlat a ni," tiin a sawi belh.
Heskey-a'n Arsenal captain Martin Odegaard-a chanchin chu entirnan a hmang a. "Martin Odegaard-a chanchin nen khan a inang hle thei a ni. Odegaard-a'n kum 16 a nih laia Real Madrid a zawm khan club tin mai khan an beisei a. Mahse a tawpah chuan kum tin loan-in a chhuak kual a, Madrid tan khan a khel mang lo a nih kha. Spain club liante i pan a nih pawhin, first-team-a luh tlang nghal mai hi kawng awlsam a ni ngai lo. A ṭha zawng erawh chu first-team-ah mipa puitling zingah inkhelin i ṭhanglian thei dawn tih hi a ni," tiin a sawifiah.
"Khawi hmun pawh nise, first-team-a hmun chang tur chuan i theihna chauh i ring tur a ni. Real Madrid emaw Barcelona emaw a thlang a, amahah inrintawkna sang tak a nei a nih chuan, player leh a chhungte thutlukna siam hi kan sawisel thei lo ang," a ti.
A tawpna atan Heskey-a'n Gabriel-a chu khelhna hmun hmuh theihna apiang zawng turin a fuih a, rawltharte tan chuan first-team-a khelh theihna hun nghah reng chu career tihkhawlohna a nih thu a sawi. "Heng naupangte hian khelmualah an inlan a, an khelh ngei a ngai a ni. Mahse club dik tak leh hun dik tak thlan thiam erawh a pawimawh hle. Kum 18, 19, leh 20 i tlin hnu thlenga nghah reng mai hi chu i career i tihkhawlohna mai a ni," tiin a sawi zui a ni.
