Manchester United captain hlui Wayne Rooney-a fapa Kai Rooney chuan a pa club hlui Old Trafford huang chhungah hma a sawn ve mek a, mahse he kawng a zawhnaah hian a rualpui dangte tawn ngai loh chona leh thil harsa tam tak a hmachhawn ve mek a ni. Kum 16 mi rawlthar hian senior inelna tak takah game khat mah la khel lo mah se, mipuite ngaihven a hlawh hma em em a, a pa Wayne Rooney-a'n a kum rualpui a nih laia ngaihven a hlawh ai pawhin Kai-a'n chanchinbu hmai a luah hma zawk hle a ni.

United academy-ah Kai hian a kum rualpuite zingah goal a khung hnem thei hle a, Under-18 team tan pawh goal a khung tawh bawk. Chutih rualin, chhungkaw hmingthang tak neih chu thil awlsam a ni vek bik lo. Rawlthar Kai-a'n Old Trafford-a bul a ṭan chhoh tirh khan a pa Wayne-a'n a inkhel a enpui ṭhin a, mahse a tawpah chuan Wayne chu a inkhel en ve tawh lo tura hrilh a ngai hial a ni.

Kum 2024-a 'I’m A Celebrity… Get Me Out of Here'-a a tel ṭum khan a nu Coleen Rooney chuan he thil thleng hi sawichhuakin, grassroots tournament a khelh ṭhin laiin mipuite leh naupang dangten Wayne chu an bawr buai nasat em avangin inkhel pawh a en thei ṭhin lo tih a sawi. Coleen chuan, "Kai chuan Wayne hnenah chuan a inkhel en tura kal tawh lo turin a hrilh a, naupang dangte hnenah chuan 'Ka fapa inkhel ka en duh, kalsawn rawh u' han tih ngawt theih a ni si lo. Chuvangin Kai chuan, 'Ka pa, ka inkhelh pawh i en thei chuang hleinem, i lo kal hian awmzia a nei lo,' a ti ta tawp a ni," tiin a sawi. Mahse he khapna hi tunah chuan a tawp tawh a, season liam ta chhung pawh khan Wayne hi Kai-a inkhelhnaah hmuh a ni leh tawh bawk.

Kai-a'n United Under-18 tan inlanin FA Youth Cup-ah Old Trafford khelmual a rah tawh laiin, a nau Cass erawh chuan thil harsa zawk a tawk thung. Kum tling lo Cass hi Everton academy-ah awmin Under-7 tan a khel a, mahse club lamin an chhuahtir (released) ta hlauh a ni. Podcast pakhatah Coleen chuan Cass-a'n club aṭanga chhuahtir a nih thu a hriat tirh khan a rilru na lutuk chu a ṭap nasa hle niin a sawi a, mahse darkar khat hnu lekah chuan a theihnghilh leh mai a, a pi leh pute be nghalin Everton-in an chhuahtir thu a hrilh leh nghal mai niin a sawi. Hemi chungchangah Wayne chuan, "An la naupang em a ni. Cass hnenah pawh, 'Kum 9 ka nih hmain Everton academy ka zawm bik hleinem, hun i la ngah lutuk. Football hi nuam ti takin khel la, a hun a thlen chuan a rawn thleng mai ang,' tiin ka hrilh a ni," a ti.

Documentary thar 'The Real Rooneys' an siamah Wayne chuan football chu zirlai tawp thei lo a nih thu a sawi bawk a, Kai-a hnenah pawh, "Ka match hnuhnung ber ka khelh thleng khan thil ka la zir reng a ni," tiin a hrilh. Wayne chuan a fapain mipui ngaihven a hlawh dan chu ṭha taka a thunun thei chu a chhuang hle a, chumi rual chuan rawlthar hian a GCSE lehkha zirna pawh ngaihthah lo tura fuihin, chapo lo turin a zirtir reng bawk a ni.

Wayne chuan, "Kai hian ama sulhnu ngei siam a duh a, thlawp turin ka awm reng ang. Ka duh loh ber chu keima hming avanga scholarship emaw contract emaw a hmuh hi a ni. Ama theihna ngeia a hlawhchhuah a nih ka duh a ni," tiin a sawi bawk.

Kai Rooney hian United-ah scholarship a hmu ta ngei a, United manager hlui Michael Carrick-a fapa Jacey pawhin a dawng ve bawk a ni. Kum 17 an tlin hunah professional contract an ziak thei tawh dawn a, Kai tan hian kum 17 tlin tur hian thla khat tling lo chiah a hmabak tawh a ni.