Tun kar tawpah Manchester United chuan Old Trafford-ah Tottenham mikhualin Premier League an khel leh dawn a, he match-ah hian head coach Michael Carrick chuan kumin nipuia player an lakluh Carlos Baleba chu a vawikhat nan a chhawr a ngaihna a awm ta.
Brighton aṭanga £70million ngawta an lakluh Baleba hi hliam vangin United tan a la inlan thei lo a, mahse Fulham nen 1-1 a an inhnehtawk ṭum khan matchday squad-ah a tel tawh a ni. Inrinni zanah hian he Cameroon midfielder hian a manager hlui Roberto De Zerbi-a enkawl mek Tottenham a hmachhawn ngei beisei a ni a, United tana a debut match hmasaber a khel thei dawn a ni.
Chutih laiin, Manchester United manager hlui ropui Sir Alex Ferguson chuan Pep Guardiola chungchanga a rilru inchhirna chu a lehkhabu thar 'Games of My Life' tiha a ziahnaah a phochhuak. Kum 2012 khan New York khawpuiah Pep Guardiola nen zanriah an ei dun a, mahse kha hun a tlai hret avanga Old Trafford-a a thlaktu ni tura a thlem hmin hman lo chu a pawi a tih thu a ziak a ni.
Ferguson chuan, "Kum 10 liam ta chhung khan kum 2012-a New York-a Pep nena zanriah kan ei dun kha thla engemaw zatah a hma daiha lo thleng zawk se engthil nge thleng ang tih ka ngaihtuah fo ṭhin. Khatih lai khan inkhelh enkawl ka chawlhsan dawn chiang em tih ka la tichiang lo a, Pep erawh chuan Barcelona-a kum li chhung inelna hrang hranga hlawhtlinna lian tak a lak hnuah, Bayern Munich zawm a tum nghet tlat tawh a ni.
"Hun kir tir leh theih nise chuan, thla engemaw zata a hmain zanriah kan ei dun ang a, Italian wine Tignanello tam tak in pui chungin a hmakhua chu Manchester-ah a awm zawk a ni tih hmin ka tum tlat ngei ang. Mahse vanduaithlak takin kan tan thil a tlai hman ta a ni," tiin a ziak.
Hemi bakah hian, Manchester United chhuahsan aṭanga kum hnih a liam hnuah Scotland midfielder Scott McTominay chu Old Trafford-ah a rawn kir leh mai theih dinhmunah a awm tih chanchinthar a chhuak bawk. McTominay hi Napoli a zawm hnuah Serie A nomawi a chawipui a, team-ah pawh player pawimawh berte zinga mi a ni chho a ni.
Mahse Sky Sports Switzerland tarlan danin, kum 28 mi he midfielder hi January transfer inhawng turah Napoli chhuahsan mai theih dinhmunah a awm a, United pawhin lakluh leh theih dan chungchang an ngaihven ṭan tawh nia tarlan a ni. Aston Villa leh Real Madrid te pawhin McTominay hi an ngaihven hle a, a agent-te pawhin Premier League club hrang hrang an dawr mek bawk.
Italy lama thudawnna chuan McTominay hian Napoli nena contract thar ziah hi a duh ber thu tarlang mah se, inremna an hmu thei lo a nih chuan England-a kir leh hi a inpeih reng thu an tarlang tel a ni. Napoli nena inbiakna a tluang lo a nih chuan, he midfielder hi thla tlem te chhungin club thar panin a chhuak mai theih dinhmunah a awm mek a ni.
