Manchester United rawlthar theihna ngah JJ Gabriel-a hmabak chungchang a rik chhoh mek laiin, khawvel puma footballer rawlthar hlawh hnem zual mi 10-te sum lakluh zat chu a rawn langsar chho ta hle.

Nipui thleng daih United-in registration an neihpui lai hi an ṭhiahsak (cancel) a nih loh chuan, Gabriel hian Premier League club dang a zawm an remti dawn lo a ni. Mahse European Union (EU) passport a kawl tel miau avangin Europe khawmualpui club liante pan theihna kawng a inhawng thung a, Real Madrid, Barcelona leh Bayern Munich te pawhin lakluh tumin an ngaihven reng a ni.

Mahse The Times chanchinbu tarlan danin, Bayern Munich chuan Gabriel-a aiawhtute'n kum khata hlawh atana £1million (£1m) aia tlem lo an phut chu pek an inhuam lo niin an tarlang a. He a hlawh phut zat hi hmu ta sela chuan khawvela rawlthar hlawh hnem berte zinga mi a ni nghal hial ang. Tun dinhmuna khawvel football-a rawlthar (teenager) hlawh hnem zual 10-te chu hengte hi an ni:

10. Max Dowman (Arsenal) - Arsenal rawlthar kum 16 mi Dowman hian tunah chuan kar khatah £350 chauh a la hlawh a. Mahse kumin December thlaa kum 17 a tlin hunah kar khata £35,000 (kum khatah £1.8m vel) hlawh theihna tur contract thar a hmaah an chhawp sa tawh a ni.

9. Ayyoub Bouaddi (Manchester City) - City midfielder kum 19 mi, Morocco tlangval hian kar khatah £35,000 a hlawh a, kum khatah £1.8m a la lut bawk.

8. Geovany Quenda (Chelsea) - Chelsea winger leh wing-back ni kawp thei hian kar khatah £35,000 hlawhin, kum khatah £1.8m vel a lalut mek a ni.

7. Ethan Nwaneri (Arsenal) - Arsenal aṭanga Borussia Dortmund lama loan-a chhuak mek kum 19 mi hian, kar khatah £40,000 hlawhin kum khatah £2m vel a la lut a ni.

6. Lennart Karl (Borussia Dortmund) - Kum 18 mi attacking midfielder hian kar khatah £40,000 aṭanga £50,000 inkar hlawhin, kum khatah £2m aṭanga £3m vel a lalut niin an chhut.

5. Franco Mastantuono (Real Madrid) - Kum 19 mi winger, tunah Fiorentina lama loan-a khel mek hian Real aṭangin kum khatah £3m vel a hlawh a ni.

4. Estevao Willian (Chelsea) - Kum 19 mi Brazilian star hian Chelsea-ah kar khatah £60,000 hlawhin, kum khatah £3.1m lai a lalut a ni.

3. Pau Cubarsi (Barcelona) - Barcelona tlarhnung laili ngheng mektu Cubarsi hian kar khatah £85,000 a hlawh a, kum khatah £4.3m a la lut mek bawk.

2. Yan Diomande (Real Madrid) - Real Madrid winger thar lakluh hian a hlawh zat hi inang lo deuh mah se, kum khatah £9m aia tlem lo (kar khatah £170,000 vel) a hlawh niin an tarlang.

1. Lamine Yamal (Barcelona) - Khawvela rawlthar thiam ber tia chhal Yamal hian kum 19 mi chauh la ni siin, kum khatah £19.5m tehmeuh a la lut a, kar khatah chuan £370,000 vel zet a hlawh a, pakhatna dinhmun a luah chiang hle a ni.