Manchester City chuan independent commission-in Premier League sum leh pai dan bawhchhiatna puhna zawng zawngah thiam loh an chantir hnuah, he thutlukna hi CAS leh thuneitu sang zawk hnenah appeal an thehlut a. Manchester United elpui lian City hian thla liam taa thutlukna siam chu pawm lovin thil sual engmah an tih loh thu an la ṭang ve tlat thung a ni.
October international break chhung khan he thu hi a rawn puakchhuak a, Tottenham nena an inhmachhawn hmain Manchester United manager Michael Carrick chu Carrington training complex-ah chanchinbumite'n he chungchang hi an zawt chiang a ni. Kum 45 mi United legend hian Manchester City leh Premier League thil thleng chu a huho zawng chauh ni lovin, ama mimal nun thleng pawha nghawng a neih dan a phawrhchhuak bawk.
Manchester Evening News tarlan danin Carrick chuan, "Kawng tam takin sawi a harsa hle mai. Zawhna tam tak a siam a ni. Thubuai kal mek a ni a, sawi theih chin tawk ka nei. Keima mimal tak pawhin zawhna ka nei ve bawk a, a chhan chu keimah ngei pawh min nghawng ve miau a ni. Engtin nge thil a kal zel dawn tih kan la thlir a ngai ang. Mitin tana rang thei ang bera chinfel a nih hi a ṭha ber," tiin a sawi.
Premier League thutlukna hian 2009-10 season aṭanga 2017-18 campaign inkar a huam a ni. Carrick hi Sir Alex Ferguson-a hun lai leh a chhuah hnu thlenga United player pawimawh lo ni tawh a ni a, hun kal tawha thil thleng chu laklet theih a nih tawh loh thu a sawi lang bawk. "Engti zawng mahin kha hnehna hun ropui kha laklet theih a ni tawh lo. Kan zaiduh ber chu a tawpa chungnung ber nih kha a ni a. Chu chiah chu a ni mai. Hun kal tawha thil thleng chu a liam tawh a ni," a ti.
City lamin appeal an thehluh avang hian Premier League-in hremna a lek kawh hmain hun a duh rei phah maithei a ni. Carrick chuan he thubuai hi rang taka chinfel a nih theih nan hunbi mumal tak siam a pawimawh hle tih a tarlang nawn leh a. "Ka sawi tawh ang khan, chak taka chet zung zung hi thil pawimawh tawpkhawk (essential) a ni. Heta ṭhua hetiang sawi hi ka tan chuan a lang chiang reng mai. Thlir dan kawng hrang hrang a awm a, mahse mitin tan thil a fiah a, kan chinfel a, hmalam kan pan theih nan chak taka chet a ngai a ni. Hetiang dinhmun sanga hetiang thil a thleng hi a la awm ngai lo hrim hrim a. Eng nge thleng dawn tih hi kan hriat vek a ngai a ni," tiin a sawi belh.
Kum 2012 khan Premier League season tawp niah City-in goal awmhnuhnung hmangin United lakah title an lo chhuhsak tawh a, khami ṭum khan Carrick hi Ferguson-a squad-ah a tel nghe nghe a ni. England international hlui chuan hremna avanga title pek let leh pawh ni se, khatiang huna an lak tur lakbo a nih vanga rilru natna chu a tidam zo dawn tawh chuang lo tih a sawi. "Kha mi hun laia i ngaihtuahna leh i awmdan kha engmah hian a thlak danglam thei tawh lo. I la let thei tawh lo va, engpawh thleng se, nomawi chu min pe let pawh nise khatiang hun ropui tak kha kan la let thei tawh chuang lo a ni," a ti.
City lakah hian point paihsak, nomawi laksak, emaw league aṭanga hnawhchhuah hial te an sawi chho mek a. Hemi chungchangah hian Carrick chuan thutlukna fel a la awm loh avangin sawi thui vak a duh loh thu sawiin, "Tun dinhmunah chuan engmah a la fel lo. Chuvangin engmah ka la sawi thui lo mai ang e. Kha hun kha khelmuala i beih chhuah ngei a ngai a, medal engemaw pek let leh hian hnehna chan vanga hlimna kha a rawn thlen let thei tawh lo," tiin a sawi tlip a ni.
Inrinni tlai dar 5:30 (UK time) hian Manchester United chuan Old Trafford-ah Tottenham an mikhual ang a, Premier League match khel turin an inbuatsaih chhunzawm dawn a ni.
