Manchester United striker Benjamin Sesko chuan chawn ruh (shin) hliam a tawrh nawn leh tak avangin eng chen nge a chawlh dawn tih hriat theih a la ni lo a. He hliam vang vek hian thla li dawn khelmual a lo chhuahsan tawh a, a rawn kir leh hnu kar tlemte lekah a chhuak nawn leh ta a ni.

Manchester United chuan kum 23 mi striker man to £73million man hi a dam fel theih nan zai (surgery) mai an rilruk a, amaherawhchu tun dinhmunah club-a medical expert-te chuan enkawl dan ṭha ber tur an la ngaihtuah mek rih a ni.

Season liam ta tawp lam aṭang tawh khan Sesko hi a chawn ruh na hian a lo tibuai tawh a, March thlaa ram tana international break awm pawh a hmaih hial a ni. Hemi hnu hian na chung chungin a khel hram hram a, May thla tir lama Liverpool an hmachhawn ṭum khan a tina zual ta a nih kha. He Slovenian striker hian nipui chhungin pre-season match pakhat mah a khel thei lo a, thla thum leh a chanve chhungzet a inlan theih loh hnuah season thar ṭan niah khelmualah a rawn kir ve ṭawk a ni.

Champions League-ah Sabah lakah leh Carabao Cup-ah Brighton lakah bul a ṭan zui a, mahse Brighton an hneh loh hnu khan a chawn ruh na chu a rawn chhuak nawn leh a, khelmual pawn lamah hun a hman leh a ngai dawn ta a ni.

Hemi chungchangah hian head coach Michael Carrick chuan, "A natna ngai chiah chiah kha chu a ni chiah lo a, mahse a na awmna hmun chu a inhnaih hle thung. Eng chen nge a awh dawn tih hriat theih nan kan la buaipui mek a ni. A hma thei ang bera a lo kir leh ngei chu kan beisei a, mahse tun dinhmunah chuan thil a la chiang rih lo," tiin a sawi.

Zai a ṭul dawn em tih an zawhna chu chhang zelin Carrick chuan, "Thlir dan kawng hrang hrang a awm a ni. A tira a natna aṭang khan a dam chhuak ṭha hle a, hun pawh a hmang rei tawk viau bawk. Mahse a chang chuan taksain duh loh zawn a nei ṭhin a, chumi mil chuan kan chet vat a, khelmuala a rawn luh leh vat theih nana kan tih a ngai a ni," tiin a sawi bawk.

Tottenham an hmachhawn hunah Sesko hi chhawr theih a nih dawn loh laiin, £70million senga an lakluh thar midfielder Carlos Baleba erawh chuan a debut a siam ve thei thung maithei a ni. Kar thum liam taa Fulham an hmachhawn ṭum khan bench-ah a ṭhu tawh a, kar khat liam ta khan mipui en loha friendly match an khelhah Lausanne-Sport lakah minute tlem a khel hman bawk.

Baleba chungchang sawiin Carrick chuan, "Carlos-a dinhmun hi a ṭha chho tial tial a. Khelmuala a han awm thei leh kan hmuh theih chu a lawmawm hle a, kar hmasa training match-ah pawh a inlan a, a tan chuan hun ṭha a ni. Chutih rualin pre-season tawp lam a hmaih nasa a, chuvangin a theihna sang ber thleng tur chuan dawhtheihna tlem neih a ngai a ni. A hun dik tak thlanchhuah chu kan mawhphurhna a ni a, team tan theihna tam tak a nei a ni. Kan midfielder neih mekah hian kan lungawi em em a, player thlan tur kan ngah bawk a, Baleba hian min thuam chak belh ngei bawk ang," a ti.