Manchester United chuan kum 16 mi forward JJ Gabriel hnenah season thar atana scholarship deal an thehlut a, mahse he rawlthar hian ram pawn club a pan a nih chuan compensation atan United hian £350,000 vel chauh an dawng thei dawn niin The Guardian chuan a tarlang.
He rawlthar hi tun kar khan kum 16 a tling chiah a, hei hian a hmabak chungchangah hmanhmawh a ngaihtir lehzual a ni. A piancham a thlen tak avang hian club dang nen pre-agreement a ziak thei tawh a, United-in scholarship an chhawpchhuah hian Old Trafford-a a cham zui zel dawn tih a hrilhfiah chuang lo a ni.
The Guardian tarlan danin, United chuan Gabriel-a hnenah hian scholarship offer hi official-in an thehlut a. Thla liam ta khan a aiawhtute leh club inkarah inremlohna a awm hnuah a registration tihtawp a lo dil tawh a, first-team-a a inlan theih zat tur chungchanga ngaihdan inmil loh chu he inbiakna buai chhan lian ber a ni.
Scholarship offer hi thehlut lo nise chuan, Premier League youth rules dan ang chuan January thlaah England rama club dang hnenah man chawi lovin a chhuak thei dawn a ni. Tunah erawh chuan English club tupawhin Gabriel hi lakluh an duh chuan United an dawr tlang a ngai tawh ang a, inremna an nei thei lo a nih chuan Professional Football Compensation Committee tribunal hmaah an inlan a ngai dawn thung a ni.
Tribunal-ah hian United chuan zangnadawmna (compensation) £3million chuang bakah Gabriel-a hralh leh a nih huna a man aṭanga zaa 20 (20% sell-on clause) an beisei ang. Mahse hei hi ram danga a chhuak a nih chuan Category I academy atana FIFA compensation bituk tlangpui £350,000 vel chauh nena ngaihtuah phei chuan a inthlau hle a ni.
Gabriel hi kum 11 a nih aṭanga United-a awm tawh a ni a, kar thum chuang training-ah a inlan tawh lo bawk. Club chuan a ṭhat leh ṭhat loh hriat tumin vawi engemaw zat an be tawh niin report chuan a tarlang.
Gabriel hian Europe club dang pan hi a duh zawk nia hriat a ni a, chuta a kal a nih chuan compensation pawh a tlem hle dawn a ni. Real Madrid chu a kal duhna bera sawi an nih laiin, Barcelona, Bayern Munich leh Paris Saint-Germain te pawhin a dinhmun an thlithlai reng a; amaherawhchu a pan tur club hi a la titlu lo thung.
A nu leh pate aṭanga EU passport a neih theih avangin kum 18 a tlin hmain ram pawn club a zawm thei dawn a ni. Hmanni lawka team thlalak an neihah Gabriel-a a lan ve leh avangin inrem leh mai tura beiseina a awm hman a, mahse senior team-a khelh theihna kawng chungchanga an inlungrual lohna erawh chinfel a la ni lo.
Player lakluh dan (recruitment rules) bawhchhiat a nih an hriat chuan United hian dan anga hma lak pawh an rilruk maithei a ni. Tun dinhmunah chuan scholarship offer hi Gabriel-a kutah a awm mek a; Premier League elpui club dang a thlang a, man zat inremna an siam lo a nih chuan tribunal chuan compensation tur hi a bituk sak ang.
