Napoli chuan Scott McTominay hnenah contract thar ziah an rawt a, hei hian Manchester United lama a kir leh theihna tur kawng a hawnsak thei niin report a ni.
Kar engemaw zat liam ta chhung khan he Scotland international hi Italy rama a chet ṭhat em avangin Old Trafford lamin laklet leh an duh nia thawm a awm chhunzawm reng a ni.
Kum 2024 khan McTominay hian Napoli hi a zawm a, hemi hnu aṭang hian a dinhmun a ṭha chho hle. A season hmasa berah Partenopei chu Serie A title (Scudetto) a lakpui nghal a, league chhungah player ṭha ber chawimawina MVP award a dawng hial bawk a ni.
Hemi hnu hian Europe khawmualpuia midfielder goal khung thei berte zinga mi a nihna a pholang chho zel a. Mahse, Diego Armando Maradona Stadium-a a hmabak tur erawh a la chiang chiah lo thung. A contract neih lai hi kum 2028 thleng a la daih a, thil thleng thei lakah Napoli hotute pawh an rilru a buai ṭan a ni.
Contract thar ziah kawngah hian an duhdan a inthlau hle niin tarlan a ni a, McTominay-a hlawh phut zat hi Napoli lamin pek an huphurh deuh niin an sawi. Aston Villa leh United te chuan he Scotland midfielder hi an ngaihven nia sawi a nih laiin, The Peoples Person report hnuhnung zawkah erawh Red Devils hian tun dinhmunah chuan an bawhzui rih lo niin a tarlang thung.
Chuti chung chuan Napoli-a a awm zui zel tur chungchangah inremna a la awm loh avangin hetiang sawizawmna hi a reh mai a rinawm loh a ni. Chutih laiin Napoli chuan McTominay hi nakina a chhuah theihna tur remchang siamsak tura "gentleman's agreement" (inkawmngeihna leh inrintawkna thuthlung) zep tel an inpeih niin a lang ta a ni.
Italian journalist Giovanni Scotto chuan SportWitness kaltlanga a sawi danin, "Napoli-ah contract thar a la ziak lo a, thil engkim ngaihtuah chian phawt a duh a ni. Manchester United leh Aston Villa ten ngaihvenna an lantir ve bawk," a ti. Scotto chuan sawi zawmin, "Mahse McTominay hian nghah rih a tum a ni. Napoli chuan McTominay hi chan an duh lo a, gentlemen’s agreement hmanga a chhuah leh theihna turin contract thar an zawrh dawn a ni. Clause mumal tak a awm erawh ka hre lo. He midfielder hian dawrna lian tham a dawng a nih chuan, kum hnih emaw kum thum emaw hnuah Napoli hian an chhuah tir thei ang," tiin a sawi.
Scotto chuan sawi chhunzawm zelin, "Player hian June thla anga hmaah chhuah a duh a nih chuan, nipui lo thleng tura a man hi €25-30m (£21.7-26m) aia tlem lo a ni ang," a ti bawk.
Hemi inkarah hian Manchester United chuan Inrinni hian Old Trafford-ah Tottenham Hotspur an lo mikhual dawn a, khelmualah an inlan leh thuai dawn a ni.
