Kar liam ta tawp lam khan Manchester United chuan Atlético Madrid tana khel ṭha em em, an midfield lairil Pablo Barrios chu an mit fukna a nih thu thawm a rawn chhuak a. United neitu thar INEOS chuan he La Liga star lak theih a nih leh nih loh chungchangah Atlético hotute an lo zawt fiah tawh niin thudawnna hrang hrang chuan an tarlang a ni.
Kumin nipui laia United-in tlar laili thuam nan player an lo lakluh tharte chet dan leh theihna phochhuahah sawiselna a awm neuh neuh laiin, Barrios-a chanchin hi a rawn ri chho a. Old Trafford-a an lakluh tirha an theihna anga khelmualah an la chet theih meuh loh avangin, Red Devils hian an midfield thuam ngheh lehzual nan hma an la chhunzawm zel a ni.
Kum 23 mi Barrios lak tumna hi thutlukna huaisentak a ni ang. Ani hi Diego Simeone-a hnuaia Atlético project pawimawh berte zinga mi a ni a, club legend Koke-a hmunruak luah theitu tura ngaih a ni hial bawk. Club legend Koke ang chiahin, khelmual chhungah inkhelh kalhmang a thunun thiam a, ball a vawrh kualin team kuta ball awm reng nan tha a thawh hlawk em em a, tactics zawm kawngah pawh player thuawih tak a ni. Manager tupawh mai tan player itawm tak a nih miau avangin, United-in an ngaihven tih thawm hian Madrid lamah ngaihṭhatlohna nasa tak a thlen hial a ni.
Mahse he thawm hian Spanish khawpui chauh a tibuai lo. TeamTalk tarlan danin, European champion PSG pawhin Parc des Princes lamah he rawlthar hi an ngaihven takzet tih a lang. TeamTalk chuan, "Atlético rilru fiah thei tura dinhmun ṭha bera ding chu Paris Saint-Germain an ni a, thudawnna chuan an ngaihven zui reng tih tarlangin, an manager Luis Enrique pawhin he player theihna hi a ngaisang hle a ni," tiin an ziak.
Barrios lak theih a nih leh nih loh United-in an ngaihven tih an hriat rual hian PSG hotute pawh an harh chiang hle a, Red Devils te hma khalh tur hian theihna an phawrh chhuak ve ngei tura ngaih a ni. INEOS hian he La Liga midfielder langsar lak tum hian inelna hautak tak an hmachhawn a ngai dawn a; TeamTalk chuan Chelsea, Arsenal, Liverpool leh Manchester City te pawhin Barrios hi an thlithlai reng thu an tarlang bawk a ni.
He thuthang hi thudawnna sang ber (tier-one sources) lam aṭanga nemngheh la ni chiah lo mah se, Barrios-a theihna leh Wanda Metropolitano-a a chet ṭhat dan en hian Europe club ṭha ber berte mit a la zui zel dawn tih a chiang. Manchester United hian Barrios hi lakluh an nawr zui zel a nih chuan transfer indona boruak sa tak an paltlang a ngai dawn a, he rawlthar theihna ngah tak hian Atlético Madrid a chhuahsan dawn nge dawn lo tih chu ngaihven a hlawh chho hle dawn a ni.
