Lisandro Martinez chuan Manchester United-ah a hun a hmang zo dawn hnai niin a lang. Khelmual chhung leh pawn lamah he Argentina international hian buaina hrang hrang a tawk chho mek a, kum thar January transfer bazar a inhawn hunah Barcelona chuan lakluh an inhuam niin chanchinbu lamin an tarlang ta a ni.
United hotuten club an enkawl dan chungchanga Martinez-a'n na taka a sawiselna kha fan-te rilruah a la thar hle a. Inrinni liam taa Chelsea laka red card a hmuh phei kha chuan fan-te lungnihlohna a ti zual lehzual a ni. He match-ah hian yellow card a hmuh hnu minute hnih lekah yellow card dang a hmu leh nghal a, penalty a chhuah zui chu Cole Palmer-a'n goal-ah chantirin, Stamford Bridge-ah Red Devils chu 2-0 in an tlawm phah a nih kha.
Tun hnai match hrang hrangah Martinez-a tihsual avangin United hian goal ho tak tak an chhuah fo va, fan-te pawhin a chetsual zozai hi an chhiar nawn nasa hle. Ipswich lakah tihsual ngai miah loh tiin tumpuite goal a pe a; Everton mualah a chetsual avangin khingpuiten an rawn umphak phah bawk. Fulham lakah ama lamah (own goal) ti lutin United-in point hnih an hloh phah a, Tottenham Hotspur lakah pawh defensive line vawng ṭha lova Dominic Solanke-a a lo pawh tlat avangin goal an chhuah phah bawk a ni.
Heng thil thleng avang hian nakkum lama Old Trafford a chhuahsan mai an ring chho ta hle a, La Liga champion Barcelona nena sawizawm an ni chho ta reng bawk. Spain aṭanga report thar ber tarlan danin, Camp Nou pan theihna kawng a awm mekin a lang. Barcelona hian an tlar hnung lamah hliam an tawrh nual avangin, January thla hian centre-back thar lakluh an mamawh hle a ni.
Sport chanchinbuin Laurie Whitwell-a thu ziah a lakchhawn danin, Spanish champion hian Martinez hi ngaihven viau mah se, transfer tihpuitlin a nih theih nan thil khirh tak (condition) a awm thung. He chanchinbu hian: "Lisandro lakluh Barcelona-in an ngaihvenna hi sum lama inremna tlawm zawk siam theih a nih leh nih loh chungchangah a innghat a ni. Thlasik transfer window-ah Financial Fair Play (FFP) dan avangin Blaugrana hian sum hman theih chin an nei tlem hle a, a chhan chu nipui liam ta khan Gordon, Rodri, Adeyemi, Gabriel Jesus, Livakovic, Bisiwu leh Joao Cancelo te lakluh nan sum tam tak an lo seng tawh vang a ni," tiin an tarlang.
Martinez-a contract dinhmun hian Barcelona tan kawng a hawng ṭha hle bawk a ni. Nakkum nipuiah a contract neih lai hi a tawp dawn tawh avangin, United hian a man to takin an hralh thei kher lo maithei a ni. Club chhungah he defender hma hun tur hi sawiho tura ruahman a ni a, chu chuan transfer kal chhoh dan tur pawh a hril thuk hle ang.
Contract thar ziah theih a nih loh va, United lamin kum khat dang pawhsei theihna an neih sa an hmang lo a nih bawk chuan, Catalan giants hian dinhmun remchang chu chuhin man tlawm zawka lakluh an tum ngei a rinawm a ni.
