Manchester United chu Premier League table-ah 17-na dinhmun hial luahin an tlahniam mek a, thla hnih chuang zet league match-ah hnehna an chang tawh lo a ni. Head coach Michael Carrick-a tactics te chuan sawtna a thlen meuh lo a nih pawhin, INEOS lamin transfer bazar an hman dan fuh tawk lo leh squad pumhlum chet chhiatna chu hetianga an tlahniam ta thut chhan bulpui ber a ni chiang hle.
Chelsea an hmachhawn ṭum khan player-te chuan khelmualah theih tawp chhuah an intiam a, first half chhung kha chuan khelmualah an langsar zawk hial nghe nghe; mahse Lisandro Martinez-a chetsual leh khelmual chhung thil thlengte avangin boruak a inthlakthleng leh ta vek a nih kha.
Tun season-a United squad zinga beisei phak ta lo zualte zingah an goalkeeper Senne Lammens chu a tel a. A che chhe ber chu ni hauh lo mah se, he Belgian goalkeeper hi a season hmasaber nena khaikhin chuan a theihna a tlahniam hle a ni. Season liam taa debut season ropui tak a neih hnuah, kum 24 mi keeper hian tun season-ah chuan goal ven kawngah rintawk a hlawh zo meuh lo a; shot dan kawngah te, thutlukna siam zung zung kawngah te leh goal line kalsan ngam loh chungchangah sawisel a tawk nasa hle bawk.
Royal Antwerp goalkeeper hlui tana harsatna lian ber chu tlar hnung aṭanga ball khelh chhuah (build play from the back) thiam tawk loh hi a ni a, hei hi Michael Carrick-a khelh dan phung ball in-pass kual tam duh chi (possession-based style) nena inmil lo tak a tling a ni.
German chanchinbu Fussball News tarlan danin, INEOS hotute chuan he harsatna hi ngun takin an thlir a, United tana number 1 jersey chuhpui ngam tur goalkeeper naupang theihna nei ṭha dang lakluh theih dan an zirchiang mek a ni. VfB Stuttgart goalkeeper Dennis Seimen chuan English league title vawi 20 ngawt lo la tawh United mit a la ta chat a; a chet ran zia (reflexes), penalty area a thunun theih dan bakah, tlar hnung aṭanga inkhel a pawtpharh thiamna (playmaking ability) te chu United hian an ngaihven em em a ni.
He kum 20 mi German goalkeeper ngaihventu hi Red Devils chauh an ni bik lo va, European club lian dang Inter Milan leh Atletico Madrid te pawhin he keeper naupang hmasawn chhoh dan hi an thlithlai reng bawk a ni.
Stuttgart lam pawhin an goalkeeper naupang hian ngaihven a hlawh hle tih an hria a, a man atan €25million aṭanga €30million vel an chhiar a ni. Fussball News chuan, "VfB Stuttgart chuan Dennis Seimen-a chunga club lian ngaihvenna a nasat chhoh mek thu an hria a. Manchester United pawhin he keeper naupang lakluh hi an ngaihtuah thutak hle. Inter Milan leh Atletico Madrid te pawhin a chetdan an thlithlai reng bawk. Stuttgart hian official takin a man tur la bituk lo mah se, dawrtute aṭanga €25m leh €30m inkar thehchhuah a nih chauhvin hralh an ngaihtuah dawn niin a lang," tiin an tarlang.
January transfer window-ah chuan hetiang inleina lian hi a thleng mai lo maithei a, mahse Lammens hian a theihna sang a pho chhuak leh thei lo a nih chuan nakkum nipui bazarah erawh thil a danglam thei dawn a ni. Goalkeeper lakluh bakah hian, INEOS chuan January transfer bazar inhawng turah hian an tlar hnung thuam ṭhat bakah, Benjamin Sesko-a hliam buaina avangin striker thar lakluh an ngaihtuah tel bawk a ngai hle ang.
