Manchester United head coach Michael Carrick chuan club enkawltu a nihnaa a chawlhkar hnuhnung ber hmachhawn mekin in-hria lo mah se, Roma leh Aston Villa an hmachhawn turah an result a ṭha lo a nih chuan banna laka fihlim ngaihna a awm loh thu a pawm.

Kar liam taa Bournemouth laka 3-0 a an tlawm hnu khan hna a ṭanga ban nghal mai tur anga lang a nih laiin, Carrick hi hun pawhsei sak lailawk (stay of execution) a ni a. Kum 45 mi hi international break thleng chuan enkawltu a nih hmel a, mahse Inrinni-a Chelsea laka an tlawm leh tak avangin inelna hrang hrangah match meuh pakua (9) a zawnin chak nei lo dinhmun an thleng ta a, an tlawmna zawn pathumna pawh a ni hial a ni.

Tun kar chhung hian hnehna an chang lo a nih chuan, international break chhungin Carrick hi ban a ni ngei dawna ngaih a ni a. Heti a nih lai hian Stamford Bridge-a an inkhelh ṭum khan first-half lamah a bikin an khelh danah hmasawnna hmuh tur a awm thung.

Champions League lamah pawh Atlético Madrid leh Como te an hneh loh tak avangin an dinhmun a derthawng hle a, Roma an hmachhawn turah hian an in-adjust leh a ngai takzet a ni. Premier League lamah pawh kar tawp match result a zirin relegation zone-ah pawh an tla thla thei dinhmunah an ding mek bawk.

Heti chung hian Carrick-a'n Old Trafford a chhuahsan a hnaih tawh anga inhriatna a neih miah loh thu leh, chona thar hmachhawn turin phurna leh thahrui a la neih reng thu a sawi a ni.

Match pahnih chiah enkawl tur nei angin a inhria em tih zawhna chhangin Carrick chuan, "Aih, a thleng lo reng reng. Hmakhua ka thlir lawk thei lo a, thil thleng tur i hre ngai lo a ni. Eng nge thleng dawn ka hre bik lo.

"Mahse chuvang chuan ka rilru put dan a danglam phah lo va. Naktuka match atana kan inbuatsaih dan pawh a danglam chuang lo a, a nihna takah chuan naktuk inkhel tur hi ka nghakhlel hle a ni. Naktuk match thlen hun hi ka nghakhlel takzet a ni.

"Kan result tawhte leh thil thleng mekte thlirin min a ta emaw i ti mai thei, mahse naktuka match khelh hi ka nghakhlel takzet a, chu zawng chu ka rilru luahtu a ni. Chumi hnua thil thleng tur chu a thleng tur ang a ni mai ang a, a thlenna lam lamah a kal ang, mahse naktuk zan inkhel hi zan chhinchhiah tlak tak a nih ngei kan tum a ni," tiin thutak takin a sawi.