Michael Carrick-a hnuaia khel Manchester United chuan relegation zone-a awm mek lakah point hnih an hloh belh leh ta. International break hmain Fulham nen 1-1 in an lo inhnehtawk tawh a, chawlhkar thum chhung chawlh an neih hnuah Tottenham Hotspur chu Old Trafford-ah an mikhual leh a, United lakah beiseina a sang hle a nih kha. Amaherawhchu, beisei loh tak maiin Spurs player pakhat hnawhchhuah a nih hnuah player 10 chauh an khing chung pawhin, stoppage time-ah an siphurh an rulhtir a, mualneitu lamin an beisei phak loh lutuk inkhelh an nei nawn leh ta a ni.
Match ruk khelh tawhah point ruk chiah an hmuh avangin, Manchester United hian kum 40 chhunga league season bul an ṭan chhiat ber ṭum an tawng mek a ni. Hei hian Michael Carrick-a'n club head coach hna a chelh tawk meuh em tih zawhna lian tak a siamsak a, mipuite leh chanchinbumite sawiselna a pumpelh thei ta bik lo a ni. Tun dinhmunah hian club enkawl lai nei lo manager tawn hriat ngah tak pahnih—Eddie Howe leh Antonio Conte te an awm mek a, hei hian Carrick-a chunga nawrna (pressure) awm mek chu a tizual sauh bawk.
Italy lama thuthang chuan, Carrick hi ban a nih chuan a thlaktu atan United hian Conte chu an duh ber niin an lo tarlang tawh a. Chutih laiin England chanchinbu lamin an tarlan ve thung dan chuan, Newcastle United boss hlui Eddie Howe chu Old Trafford-ah hian Carrick-a thlaktu langsar ber zinga mi a rawn ni chho mek a ni. Football Insider-in an tarlan danin, Howe hian United manager nih theihna hun remchang a awm a nih phawt chuan he hna chelh hi a hnial loh bakah "a phur" (interested) hle niin a tarlang.
Kum 48 mi Howe hian Newcastle a enkawl chhung khan ṭum hnih ngawt Champions League khel turin a lo tlinpui tawh a, United hotute rilru pawh a la hle reng a ni. INEOS lamin Carrick hi ban nghal mai tumna la nei lo mah se, match hmachhawn turah result a la chhe zel a nih chuan "harsatna chinfel nana ruahmanna lailawk dang (contingency plans) buatsaih" chu an inhuam thung a ni.
Old Trafford chhungril hotute zingah Howe-a sulhnu hi an ngaisang hle a, anni club lian enkawl tura thutlukna siam theihna hun remchang awm tur hian Howe pawh a hip hle nia ngaih a ni. Bournemouth manager hlui hi khelmuala tharum leh chakna hmanga nawr na (high-intensity approach) chi coach a ni a, hei hi kumin season bultannaah Carrick-a naute laka la hmuh tur awm lo ber zinga mi a ni bawk.
